कर्तव्य ज्यान मुद्दामा संलग्न भएको आरोपमा पक्राउ परेका कटहरिया नगरपालिका-५ का २५ वर्षीय गर्भु दास सरभङलाई पुर्पक्षका लागि जेल चलान गरिएको छ। जिल्ला अदालत रौतहटको न्यायाधीश विश्वदीप बेस्राको इजलासले आइतबार उनलाई थुनामा पठाउने आदेश दिएको हो।

घटनाको सुरुवात साउन १ गते भएको थियो, जतिबेला कटहरिया-४ का सञ्जय यादव र विजय यादवले स्थानीय २५ वर्षीय नसिव बैठालाई मोबाइल चोरीको आरोपमा कुटपिट गरेका थिए। कुटपिटका क्रममा बैठाले मोबाइल ल्याउन पठाउनेमा गर्भु दास सराङ र ३० वर्षीय दिपलाल यादवको नाम लिएका थिए।

भोलिपल्ट, मोबाइलका धनी सञ्जय र विजयले नसिव बैठा र गर्भु दासविरुद्ध इलाका प्रहरी कार्यालय कटहरियामा उजुरी दिए। पछि, प्रहरीले गरेको पञ्चायती छलफलमा चोरीको आरोप पुष्टि हुन नसकेपछि दुवैलाई छोडिएको थियो। तर, बैठाको स्वास्थ्य बिग्रँदै गएपछि उपचारका क्रममा भदौ ११ गते उनको मृत्यु भयो।

मृतक बैठाकी आमा सुनैना देवी बैठाले भदौ १५ गते सञ्जय यादव, विजय यादव, गर्भु दास सराङ, प्रभु दास सराङ र शम्भु दास सराङ विरुद्ध कर्तव्य ज्यान मुद्दामा जाहेरी दिएकी थिइन्। हालसम्म गर्भु मात्र पक्राउ परेका छन् भने अन्य चार जना फरार छन्।

यता, गर्भुका बुवा रामचन्द्र सराङ र आमा पुकारी देवीले प्रहरीको मिलेमतोमा आफ्नो निर्दोष छोरालाई फसाइएको आरोप लगाएका छन्। शनिबार गौरमा पत्रकार सम्मेलन गर्दै उनीहरूले इलाका प्रहरी कार्यालय गरुडाका तत्कालीन प्रमुख डीएसपी राजन कार्कीले झूटो मुद्दा चलाएको आरोप पनि लगाए।

कटहरिया-५ की वडा सदस्य समेत रहेकी आमा पुकारी देवीले गाउँकै केही व्यक्तिहरूको राजनीतिक पूर्वाग्रहका कारण षड्यन्त्रपूर्वक आफ्ना छोरामाथि हत्या मुद्दा लगाएको गुनासो गरिन्। उनले प्रहरी प्रशासनले सत्यतथ्य छानबिन गर्नुको सट्टा प्रभावमा परी निर्दोष छोराहरूलाई फसाएको भन्दै आपत्ति जनाइन्।

डीएसपी कार्कीले भने आफूमाथि लागेका आरोपको खण्डन गरेका छन्।