कोशी प्रदेशका मुख्यमन्त्री हिक्मतकुमार कार्कीले दुई दिन अगाडि आफ्नो आधिकारिक फेसबुक पेजमा लेखे, ‘विधिको शासन, कानुनी राज र संवैधानिक सर्वोच्चता भएको देशमा कसैको हुकुमी शासन चल्दैन !’

संघीय सरकारले गरेको खर्च कटौती सम्बन्धी निर्णयमा सांसदका स्वकीयहरू हटाउने र मुख्यमन्त्री तथा मन्त्रीहरूले ३ जनामात्रै सचिवालयमा राख्न पाउने निर्णय गरेको छ । सोही निर्णय आएपछि असन्तुष्टि जनाउँदै कार्कीले फेसबुकमा आक्रोश पोखेका हुन् ।

‘देश, प्रदेश र स्थानीय तह सुशासनसहित र भ्रष्टाचाररहित ढंगले चल्नु/चलाउनु पर्छ,’ मुख्यमन्त्री कार्कीले थप लेखेका छन्, ‘संविधानले प्रदेशलाई आफ्नो बजेट बनाउने, कार्यान्वयन गर्ने र खर्च व्यवस्थापन गर्ने स्वायत्तता दिएको छ, तर संघीय सरकारको निर्देशनले त्यो अधिकारमाथि अङ्कुश लगाएको छ ।’

मुख्यमन्त्री कार्कीले सेनाको सुरक्षा घेराभित्र बसेर यस्तो स्टाटस लेखेका हुन् । भदौ २३ र २४ गतेको जेनजी आन्दोलनमा भएको विध्वंशबाट कार्यालय र निवास पनि जलेपछि करिब एक साता सम्पर्कविहीन बनेका मुख्यमन्त्री कार्की विराटनगरस्थित नेपाल राष्ट्र बैंकको प्रादेशिक कार्यालयको भीआईपी कक्षमा बसिरहेका छन् ।

कोशी प्रोजेक्टमा रहेको मुख्यमन्त्रीको अवासगृह आन्दोलनको क्रममा जलाइएपछि मुख्यमन्त्री कार्की नेपाली सेनाले सुरक्षा दिने राष्ट्र बैंकको निवासमा बसेका हुन् । मुख्यमन्त्री कार्की २४ गते निवासमै आन्दोलनकारी आएर तोडफोड गर्न थालेपछि झण्डावाल गाडी छाडेर बाहिरिएका थिए ।

प्रदर्शनकारीहरू निवासको गेटमा पुगेपछि कार्कीलाई उनका पीएसओले वैकल्पिक गेटबाट बाहिर निकालेर रानीस्थित कोशी प्रदेश प्रहरी कार्यालय पुर्‍याएका थिए । सरकारी र झण्डावाल गाडीमा असुरक्षा हुने भएपछि उनी टेम्पोमा चढेर प्रदेश प्रहरी कार्यालय पुगेको स्रोत दाबी गर्छ ।

प्रदेश प्रहरी कार्यालयबाट उनलाई नेपाली सेनाले सुनसरीको इटहरीस्थित पूर्वी पृतना हेडक्वाटरमा केही दिन राखेको थियो । त्यहाँबाट बाहिर आएपछि मुख्यमन्त्री कार्की नेपाली सेनाकै सुरक्षा रहेको राष्ट्र बैंकको गेष्ट हाउसमा बस्न थालेका हुन् ।

भदौ २४ गतेको विध्वंशमा मुख्यमन्त्रीको निवासमात्र नभएर मुख्यमन्त्री कार्यालयसहित प्रदेशका धेरै मन्त्रालयमा क्षति भएको छ । अहिले सरकारी निवाससहित कार्यालयमा भएको क्षतिको मूल्याङ्कन भइरहेको छ ।

मुख्यमन्त्री कार्यालयका जिन्सी शाखाका कर्मचारी किरण ढकालका अनुसार निवास बस्नका लागि सुरक्षित छ कि छैन भन्नेबारे प्राविधिक परीक्षणको काम भइरहेको छ । ‘निवासको परीक्षण गर्ने काम भइरहेको छ, तर मुख्यमन्त्रीज्यूको सचिवालयबाट बस्नका लागि व्यवस्थापन गर्न कुनै निर्देशन आएको छैन,’ उनले भने ।

मुख्यमन्त्री कार्की तत्काल सरकारी निवास फर्किने अवस्थामा नरहेको कर्मचारी बताउँछन् ।