देशका विभिन्न कारागारबाट भागेका डेढ सय कैदी सिन्धुलीबाट पक्राउ परेका छन् ।

काठमाडौँका नख्खु र सुन्धारा कारागारसहित विभिन्न जिल्लाबाट मंगलबार र बुधबार भागेका कैदीहरूलाई नेपाली सेना र नेपाल प्रहरीले सिन्धुलीका विभ्रिन्न स्थानबाट पक्राउ गरेको हो ।

जिल्ला प्रहरी कार्यालय सिन्धुलीका अनुसार अहिलेसम्म १६७ कैदीलाई नियन्त्रणमा लिइएको छ । स्थानीयबासीको सहयोगमा थप कैदीहरूको खोजी भइरहेको छ । 

मंगलबार जेन-जीका नाममा चलेको विनाश मच्चाउने गरी चलेको आन्दोलनका क्रममा राष्ट्रिय स्वतन्त्र पार्टीका सभापति रवि लामिछानेसहित सयौँ कैदीहरु नख्खु कारागारबाट निस्किएका थिए ।

नख्खुबाट निस्किएका कैदीहरूले मंगलबार नै राति सुन्धारा कारागारमा आगो लगाएका थिए । नख्खुबाट पनि ठूलो संख्यामा कैदीहरू भागेका छन् । अहिले प्रहरीले भागेका कैदीबारेमा आफ्नो घर, समाज वरपर देखिएमा खबर गर्न आग्रह गरेको छ ।

उता नख्खुबाट छुटेका लामिछानेले भने गृहसचिवले राजनीतिक प्रतिशोध भएको पत्र दिएको भन्दै बाहिर निस्किएको जिकिर गरिरहेका छन् ।

देशको अन्तिम अदालतले मुद्दाको अन्तिम टुंगो नगरेकै अवस्थामा गृहसचिवबाट छुट्ने पत्र दिएको जिकिर गरे पनि उनलाई जेन-जी अभियन्ताले फेरि नख्खु फर्किन अहिले दबाब बढाइरहेका छन् ।