बझाङको मष्टा गाउँपालिका ५, किनाडामा करेन्ट लागेर एक बालकको घटनास्थलमै मृत्यु भएको छ । स्थानीय राम बहादुर आग्रीका १३ वर्षीय छोरा सुरेश आग्रीको सोमबार बिहान ११ बजेतिर मृत्यु भएको हो ।

जिल्ला प्रहरी कार्यालय बझाङका अनुसार, सुरेश घर नजिकैको जङ्गलमा गोरु चराउन गएका थिए । सोही क्रममा हिजो राति आएको हावाहुरीले चुँडाएर भुइँमा लत्रिएको राष्ट्रिय प्रसारण लाइनको तारमा छुन पुग्दा उनलाई करेन्ट लागेको थियो । करेन्ट लागेर उनको घटनास्थलमै मृत्यु भएको प्रहरीले जनाएको छ ।

घटनाबारे स्थानीय धर्मराज बोहराले प्रहरीलाई जानकारी गराएका थिए । खबर पाउनासाथ अस्थायी प्रहरी पोष्ट धमेनाबाट प्रहरी वरिष्ठ हवल्दार अर्जुन धामीको कमाण्डमा ३ जनाको टोली घटनास्थलमा खटिएको थियो ।

थप अनुसन्धानका लागि जिल्ला प्रहरी कार्यालय बझाङबाट प्रहरी निरीक्षक लोकेन्द्र सिंह ठगुन्नाको नेतृत्वमा घटनास्थल अनुसन्धान टोलीसमेत घटनास्थलतर्फ पठाइएको छ ।

घटनास्थल अस्थायी प्रहरी पोष्ट धमेनाबाट करिब एक घण्टाको पैदल दूरीमा पश्चिममा पर्दछ । प्रहरीले घटनास्थलमा पुगेर कानुनी प्रक्रिया सुरु गरिसकेको जनाएको छ ।