काठमाडौं । महिला, बालबालिका तथा ज्येष्ठ नागरिकमन्त्री भगवती चौधरीले सरकारले छोरा-छोरीले कमाएको १० प्रतिशत रकम बुबा-आमालाई दिनुपर्ने नीति ल्याउने तयारीमा रहेको बताउनुभएको छ ।

भक्तपुरमा शनिबार सामुदायिक विकास तथा सेवा केन्द्र-सामुदायिक प्रहरी सेवा केन्द्र गठ्ठाघरको २०औं स्थापना दिवस एवं सामुदायिक दर्पण लोकार्पण कार्यक्रमलाई सम्बोधन गर्दै उहाँले यस्तो बताउनुभएको हो । ज्येष्ठ नागरिक ऐन, ज्येष्ठ नागरिक नियमावलीको संशोधन पारित भएसँगै यस्तो नीति कार्यान्वयनमा आउने उहाँले उल्लेख गर्नुभएको छ ।

आफ्नो आमा-बाबुको सुरक्षा र संरक्षण प्रत्येक छोरा-छोरीको दायित्व भए पनि बुबा-आमा आफ्नै घरबाट अपहेलितमा पर्न थालेपछि ऐन पारित भएसँगै सरकारले कमाइको १० प्रतिशत बुबा-आमालाई दिनुपर्ने व्यवस्था कार्यान्वयनमा आउने उहाँको भनाइ छ।

विधेयक पारित भएर ऐनले दिएको अधिकारलाई ७ सय ५३ वटै पालिकामा पठाएर जसलाई कार्यान्वयनमा ल्याउने तयारी गरिरहेको बताउदै मन्त्री चौधरीले संविधानले दिएको हकलाई अब ज्येष्ठ नागरिकले उपभोग गर्न पाउने बताउनुभयो ।