एजेन्सी । दक्षिणी जर्मनीमा भारी वर्षाका कारण विनाशकारी बाढी निम्त्याएको छ ।

बाढीका कारण ६ सय भन्दा बढी मानिसलाई घरबाट अन्यत्र सारिएको हो। लगातार परेको वर्षाले जर्मनीका डोनाउ, नेकर र गुएन्जलगायतका अधिकांश नदीमा पानीको स्तर बढेको छ । जसले तटीय सहरहरू व्यापक बाढी आएको हो । अधिकांश क्षेत्रमा पानीको स्तर एक शताब्दीको उच्चस्तरमा पुगेको छ ।

जर्मनीका २ दक्षिणी राज्य बाभेरिया र बाडेन–वुर्टेम्बर्ग सबै भन्दा बढी प्रभावित भएका हुन् । स्थानीय समय अनुसार आइतबार दिउँसो २ बजे बाभेरियाका १० जिल्लामा आपत्कालीन अवस्थाको घोषणा गरिएको छ ।

न्युबर्ग–श्रोबेनहौसेन जिल्लाका ६ सय ७० भन्दा बढी बासीन्दालाई  अन्यत्र सारिएको स्थानीय अधिकारीले बताएका हुन् । जर्मन मौसम सेवाले दक्षिणी जर्मनीका अधिकांश जिल्लामा उच्चस्तरको गम्भीर मौसम चेतावनी जारी गरेको छ ।

बाडेन–वुर्टेम्बर्गको मेकेनब्युरेन सहरमा पनि बाढीको जोखिमका कारण करिब १ हजार ३ सय मानिसलाई आफ्नो घर छोड्न भनिएको हो ।