काठमाडौं । पूर्वराष्ट्रपति विद्यादेवी भण्डारीले विश्व शान्तिका अग्रदूत गौतमबुद्धको २५६८औं जन्म जयन्तीका अवसरमा स्वदेश तथा विदेशमा रहेका सम्पूर्ण नेपाली दिदी-बहिनी, दाजु-भाइमा सुख, शान्ति र समृद्धिको शुभकामना व्यक्त गर्नुभएको छ ।

बुद्ध जयन्तीका अवसरमा बिहीबार एक शुभकामना सन्देश जारी गर्दै उहाँले समकालीन विश्वमा गौतम बुद्धद्वारा प्रतिपादित शान्ति र अहिंसा सम्बन्धी दर्शनको सान्दर्भिकता अझ बढेको बताउनुभएको हो ।  उहाँले बृहत राष्ट्रिय एकताका निम्ति अग्रसर हुन समेत आह्वान गर्नुभयो ।

गौतम बुद्धको जन्म, ज्ञान प्राप्ति र महापरिनिर्वाण भएको अत्यन्त दुर्लभ त्रिसंयोगको रूपमा रहेको वैशाख पूर्णिमालाई विश्वभरका बौद्ध धर्मावलम्बीहरूद्वारा गौतम बुद्धप्रति श्रद्धा एवं भक्तिभाव प्रकट गर्ने पवित्र दिवसका रूपमा बुद्ध जयन्ती मनाउने गरिने उहाँले जारी गर्नुभएको शुभकामना सन्देशमा भनिएको छ ।

नेपालका विभूति गौतम बुद्धले मैत्री, करुणा र अहिंसाको बारेमा दिएको शिक्षा, प्रतिपादन गरेको सिद्धान्त र दर्शनलाई मान्यता प्रदान गर्दै संयुक्त राष्ट्रसङ्घले समेत सन् १९९९ देखि बुद्ध जयन्तीलाई ‘वैशाख दिवस’को नाममा अन्तर्राष्ट्रिय दिवसका रूपमा मनाउँदै आएको उहाँले सन्देशमा स्मरण गर्नुभएको हो । 

विश्वका विभिन्न भू–भागमा मानव जातिले हिंसा, वैमनश्य, युद्धको सामना गरिरहनुपरेको वर्तमान परिप्रेक्ष्यमा अहिंसा, करुणा, पारस्परिक सम्मान, सद्भावका साथै शान्तिपूर्ण विश्वका लागि बुद्धले दिएका सन्देशहरू आज पनि उत्तिकै मननीय, उपयोगी रहेको भण्डारीले बुद्धका उपदेशहरूको पालना एवं अनुशरण गर्न सकेमा प्रत्येक व्यक्ति, समाज, विश्व समुदायकाबीचमा शान्ति, सहअस्तित्व, सहिष्णुता र पारस्परिक सम्मान थप सुदृढ हुने विचार समेत उहाँले सन्देशमा व्यक्त गर्नुभएको हो ।

गौतमबुद्धका कालजयी उपदेश, मार्गदर्शनलाई आत्मसात गर्दै धार्मिक, सामाजिक तथा साँस्कृतिक विविधताबीच आपसी सद्भाव, सहिष्णुता र बन्धुत्वको भावना अभिवृद्धि गराई बृहत राष्ट्रिय एकता निर्माण गर्ने बाटोमा सदैव अग्रसर रहन समेत पूर्वराष्ट्रपति भण्डारीले आह्वान गर्नुभएको छ ।