झापामा कक्षा १२ को परीक्षा दिएर घर फर्किंदै गरेकी एक जना छात्रामाथि गोली प्रहार
काठमाडौं । झापाको दमकमा शुक्रबार मध्याह्न साढे १२ बजे सिरहाका अमितकुमार यादवले एक जना छात्रामाथि गोली प्रहार गरेका छन् ।
दमकस्थित हिमालय माध्यामिक विद्यालय केन्द्रमा कक्षा १२ को परीक्षा दिएर घर फर्किंदै गरेकी १८ वर्षीय एलिना अधिकारीमाथि यादवले गोली प्रहार गरेका हुन् । परीक्षा दिएर घर फर्किंदै गरेकी एलिनामाथि बाटो ढुकेर बसेका यादवले गोली प्रहार गरेको इलाका प्रहरी कार्यालय दमकले जनाएको छ ।
उदयपुर स्थायी घर भएकी एनिका दमकमा डेरा गरी पढ्दै आएकी थिइन् । दमकनगरपालिका-५ स्थित ज्येष्ठ नागरिक प्रतिष्ठान अगाडि गोली हानेर यादव फरार भएको प्रहरीले बताएको हो । लाइफलाइन अस्पताल दमकमा उपचारका लागि भर्ना गरिएकी एलिनाको अवस्था गम्भीर रहेको प्रहरीले बताएको छ ।
प्रतिष्ठानको सडक किनारमा ढुकेर बसेका यादवले एनिकाको पेटमा गोली हानेपछि तत्कालै फरार भएका हुन् । तर हालसम्म जिल्ला प्रहरी कार्यालयले गोली हान्ने यादवलाई पक्राउ गर्न सकेको छैन । गोली हान्ने सिरहाका यादव भनिए पनि यसको बारेमा झापा प्रहरीका कुनै अधिकारीले औपचारिक पुष्टि गरेका छैनन् ।
गोली पेटमा लागेपछि एनिका सडकै ढलेकी थिइन् । उनलाई बेहोस अवस्थामा स्थानीयले उठाएर लाइफ लाइन अस्पतालमा पुर्याएका थिए। जहाँ चिकित्सकले रगत रोकेर उपचार थालेपछि उनको होस खुलेको हो । तर उनी अझै पनि राम्रोसँग कुरा गर्न सकिरहेकी छैनन् ।
चिकित्सकले सघन उपचार कक्ष (आईसीयु) मा राखेर उपचार थालेपछि उनको अवस्था सामान्य हुँदै गएको छ ।अहिले जिल्ला प्रहरी कार्यालय झापा र इलाका प्रहरी कार्यालय दमकको टोली गोली हान्ने यादवको खोजीमा लागेको हो । तर उनलाई अझै पनि प्रहरीले पक्राउ गर्न सकेको छैन । यसको बारेमा दमक नगरपालिकाकी उपप्रमुख रेगिमा भट्टराईले गोली हान्ने यादवलाई पक्राउ गर्न नजिकसम्म प्रहरी पुगिसकेको बताउनुभयो ।
उपप्रमुख भट्टराईले एनिकाको उपचारमा कुनै कमी हुन नदिने पनि बताउनुभएको छ । अस्पताल पुर्याउँदा रगताम्य भएकी एनिका अहिले आईसीयुमै छन् । उनका परिवारलाई प्रहरीले बोलाइएको हो । परिवारका सदस्यहरू उदयपुरबाट दमक पुग्ने प्रहरीको भनाइ छ ।