काठमाडौं । सरकारले विगत १ वर्षको अवधिमा विभिन्न विपदहरुबाट १ अर्ब २३ करोड रुपैयाँ बराबरको क्षति भएको जनाएको छ ।

शुक्रबार राष्ट्रिय सभा अन्तर्गतको संघीयता सवलीकरण तथा राष्ट्रिय सरोकार समितिको बैठकमा बोल्दै गृह मन्त्रालयका सचिव एकनारायण अर्यालले २०८० साल वैशाख महिनादेखि २०८१ वैशाख २० गतेसम्ममा प्राकृतिक तथा गैरप्राकृतिक विपदको कारण करिब १ अर्ब २३ करोड रुपैयाँ बराबरको क्षति भएको जानकारी दिनुभएको हो ।

सचिव अर्यालले यस अवधिमा बाढी, पहिरो, भूकम्प लगायतका विपदबाट ६३ जना र आगलागीबाट २६ जना नेपाली नागरिकको मृत्यु भएको पनि बताउनुभएको छ । १ वर्षमा सडक दुर्घटनाबाट १ हजार ५ सय ४७ जनाको मृत्यु भएका र ४ हजार १ सय ४७ जना गम्भीर घाइते भएका उहाँले उल्लेख गर्नुभयो ।

विपदबाट विगत १० वर्षमा ४१ अर्ब ६० करोड रुपैयाँको क्षति भएको पनि सचिव अर्यालले बताउनुभएको छ । त्यस्तै, १० वर्षको अवधिमा २२ हजार ८ सय २२ जनाको सडक दुर्घटनामा मृत्यु भएको र ४८ हजार ६ सय १६ जना घाइते भएका पनि उहाँले बताउनुभयो ।

डढेलो प्रभावितहरुलाई प्रमुख जिल्ला अधिकारीमार्फत १५ देखि २० हजार रुपैयाँ उपलब्ध गराइराखिएको र अस्थायी आवास बनाउनका लागि कार्यविधिलाई संशोधन गरेर ५० हजार रुपैयाँ दिइने पनि उहाँले बताउनुभएको छ ।

विपद व्यवस्थापन सम्बन्धि ऐन र कानूनहरुलाई परिमार्जन गर्नुपर्ने आवश्यकता रहेको बताउदै मन्त्रालय त्यसमा लागि परिरहेको सचिव अर्यालले बताउनुभयो।