काठमाडौं । महोत्तरीको मटिहानी नगरपालिका–६ जरलहवाहत्ता टोलमा बुधबार दिउँसो लागेको आगो ६ घण्टापछि नियन्त्रणमा आएको छ ।

तीव्र हावा चलिरहेको बेला बुधबार दिउँसो करिब २ बजे आगलागी भएको हो । सोही आगो अहिले पूर्णरुपमा नियन्त्रणमा आएको जिल्ला दैवी प्रकोप उद्धार समितिले जनाएको छ । आगलागीबाट मटिहानीमा करिब १ सय घर जलेर नष्ट भएका हुन् । सोही घटना सम्बन्धी विस्तृत विवरण बिहीबारसम्म मात्रै थाहा पाउन सकिने जनाइएको छ ।

बिहीबार जिल्ला दैवी प्रकोप उद्धार समितिको बैठक बस्ने भएको हो । सोही बैठकमा मटिहानी आगलागी घटनाको बारेमा सर्वपक्षीय छलफल गरिने समितिले जनाएको छ । घरबार विहीन बनेका मटिहानीका पीडित परिवारलाई नेपाल रेडक्रस सोसाईटी महोत्तरी शाखाले तत्काल त्रिपाल लगायतका राहत सामग्री प्रदान गरेको हो ।

आगलागीबाट ५ खसीबाख्रा र २ वटा सुँगुर समेत मरेको प्रहरीले बताएको छ । बस्तीभरी फैलिएको आगो निभाउन १० वटा दमकल प्रयोग गरिएका थिए । नेपाल प्रहरी, सशस्त्र प्रहरी बल, नेपाली सेना र भारतीय सुरक्षाकर्मीसहित स्थानीयको समेत सहयोगमा आगो नियन्त्रणमा आएको जिल्ला प्रहरी कार्यालय महोत्तरीले जनाएको छ ।