बहराइन विरूद्धको दोस्रो लेगमा पनि हार्यो नेपाल
दृष्टि सञ्चार संवाददाता । फिफा विश्वकप-२०२६ को एसिया छनोटमा नेपाल बहराइनसँग पराजित भएको छ। बहराइनमा गएराति भएको दोस्रो लेगको खेलमा नेपाल ३-० गोलले पराजित भएको हो।
बहराइनको घरेलु मैदानमा नेपालले सातौं मिनेटमै पहिलो गोल खाएको थियो। बहराइनका बकरले सुरूवाती गोल गर्दै घरेलु टिमलाई अग्रता दिलाएका थिए।
त्यसपछि १८ औं मिनेटमा बहराइनले पेनाल्टी पाएको थियो। त्यसलाई हेलालले सदुपयोग गरे। ३६ औं मिनेटमा अल अस्वदले गोल गर्दा नेपाल पहिलो हाफमा ३-० गोलले पछि परेको थियो।
दोस्रो हाफमा दुवै टिमले गोल गर्न नसक्दा नेपाल ३-० गोलले पराजित भएको थियो। यसअघि नेपालले चैत ८ गते बहराइनसँग पहिलो लेग खेलेको थियो।
दशरथ रंगशालामा खेल सञ्चालन हुन नसक्ने एसियाली फुटबल महासंघको निर्णयपछि पहिलो लेगको खेलपनि बहराइनमै भएको थियो।
उक्त खेलमा नेपालले पाँच गोल खाएको थियो। विश्वकपको एसिया छनोट खेलको पहिलो चरणमा लाओसलाई पराजित गर्दै नेपाल दोस्रो चरणमा पुगेको थियो।
दोस्रो चरणमा भने नेपाल लगातार पराजित भइरहेको छ। समूह ‘एच’ मा रहेको नेपाल पहिलो खेलमा युएईसँग ४-० गोल र दोस्रो खेलमा यमनसँग २-० गोलले पराजित भएको थियो।
