युइएफए नेसन्स लिगमा विश्वकप विजेता फ्रान्स र उपाविजेता क्रोएसिया बराबरी खेलेका छन् । गाएराति भएको खेलमा फ्रान्स र क्रोएसिया १-१ को बराबरी खेल्दै अंक बाँडेका हुन् ।

फ्रान्सले सुरुवाती अग्रता दिएपनि त्यसलाई जोगाउन सकेन । खेलको सुरुवातदेखि नै घरेलु टोली क्रोएसियालाई दबाबमा राखेको फ्रन्सले दोस्रो हाफमा मात्रै गोल गर्न सफल भयो ।खेलको ५२औं मिनेटमा एड्रियन राबिओटले गोल गर्दै फ्रान्सलाई अग्रता दिलाएका थिए । उनले विसाम विन यडरको पासमा गोल गरेका थिए ।

८३औं मिनेटमा एन्डरेज क्रामारिकले पेनाल्टीमार्फत गोल गर्दै खेल १-१ को बराबरीमा ल्याए । क्रामारिकमाथि अनावश्यक फउल गरेपछि रेफ्रीले भिएआरको सहायता लिदै क्रोएसियालाई पेनाल्टी प्रदान गरेको थियो ।फ्रान्सका स्टार खेलाडीहरु करिम बेन्जेमा, केलियन एमबाप्पे, ह्युगो लोरिएस, किङ्सले कोमान, जुलेस कुन्डे र एन्टोइन ग्रिजमनलाई बेञ्चमै राखिएको थियो ।