‘सानो सन्देशको ठूलो प्रभाव डिजिटल मिडियाको शक्ति
म आफैं पनि त्यति धेरै राजनीतिक ज्ञान भएको मान्छे हैन, म राजनीतिक र चुनावी अभियानको ‘डिजिटल मिडिया मार्केटिङ’ गर्दिनँ । तर, अहिले डिजिटल–सोसियल मिडियाको माध्यमबाट भइरहेका चुनावी ‘क्याम्पियन’लाई नियालिरहेकी छु ।
मैले उदाहरणका रूपमा बालेन शाहलाई देखाउन सक्छु । उहाँको चुनावी प्रचार अन्य राजनीतिक दलका नेताहरूको भन्दा भिन्नै छ । पहिले आफ्ना चुनावी एजेन्डाहरू राख्न घोषणापत्र प्रकाशित गरेर घरदैलोमा जाने चलन बढी थियो । अहिले मत आफूतिर तान्न मान्छे नयाँ ‘प्लेटफर्म’ मा पनि जाने चलन बढेको छ ।
पहिले खुलामञ्च र माइतीघरमा ठूलो भीड जम्मा गरेर नेताहरू बोल्ने चलन थियो । त्यसलाई नै प्रभावकारी प्रचारप्रसार मानिन्थ्यो । त्यसको सान्दर्भिकता अझै पनि छ, तर त्योभन्दा बढी प्रभावकारी अहिले डिजिटल मिडिया भएका छन् ।
अहिले केही त्यस्ता यूट्युब च्यानल छन्, जसमा अन्तर्वार्ता दियो भने छिटो आफ्नो एजेन्डा धेरैभन्दा धेरै मतदातासम्म पुर्याउन सकिन्छ । यो जान्नेले दिनभर घामपानीमा खटेर, माइकिङ गर्दै यति मान्छे जम्मा गर्छु भन्नै परेन ।