चुनावी गठबन्धनको प्रयासमा एमाले र राप्रपा नेपाल
नेकपा एमाले र राप्रपा नेपालबीच ३० वैशाखमा हुने स्थानीय तह निर्वाचनमा गठबन्धनका लागि सम्वाद भइरहेको नेताहरुले बताएका छन् । तत्कालीन राप्रपाले जितेका स्थानीय तह आफूलाई छाड्ने हो भने देशभर एमालेलाई सघाउन राप्रपा नेपालको नेतृत्व तयार देखिएको छ ।
राप्रपा अध्यक्ष कमल थापाले एमाले अध्यक्ष ओलीलाई भेटेका छन् भने दुई पार्टीका अरु नेताहरुले पनि सम्वाद गरिरहेका छन् । ‘एक सातादेखि कुराकानी भइरहेको छ,’ महामन्त्री सुशील श्रेष्ठले भने ।
एमाले पोलिटव्यूरो सदस्य देवेन्द्र दाहाल पनि राप्रपा नेपालसँग अनौपचारिक सम्वाद चलिरहेको स्वीकार गर्छन् ।
राप्रपाबाट अलग भएका कमल थापाले डेढ महिनाअघि आफ्नो नेतृत्वमा राप्रपा नेपाल पुनर्गठन अभियान थालेका थिए । उक्त पार्टीका महामन्त्री श्रेष्ठका अनुसार ७७ वटै जिल्लामा जिल्ला कमिटी बनेपनि ३० वैशाखको स्थानीय तह निर्वाचनमा सबै पालिकामा उम्मेदवारी दिने अवस्था छैन ।