तीनकुनेमा वृद्धालाई ठक्कर दिएर भागेको टिपर क्षेत्रपाटीमा भेटियो
(काठमाडौं) तीनकुनेस्थित नापी विभाग अगाडि ७० वर्षीया वृद्धालाई ठक्कर दिएर भागेको टिपर क्षेत्रपाटीमा भेटिएको छ ।
राति करिब साढे ९ बजे टिपरले ठक्कर दिँदा वृद्धा गम्भिर घाइते भएकी थिइन् । लगत्तै, उनलाई उपचारका लागि नजिकैको सिभिल अस्पताल पुर्याइएको थियो । तर, चिकित्सकले मृत घोषित गरे ।
मृत्यु हुने वृद्धाको परिचय खुलेको छैन । अहिलेसम्म आफन्त पनि सम्पर्कमा आएका छैनन् । घटनापछि प्रहरीले काठमाडौंका विभिन्न ठाउँमा चेकजाँच र नाकाबन्दी बढाएर टिपरको खोजी तीब्र पारेको थियो । त्यसक्रममा क्षेत्रपाटीमा टिपर भेटिएको महानगरीय ट्राफिक महाशाखाका प्रमुख एसएसपी भिमप्रसाद ढकालले अनलाइनखबरलाई बताए ।
उनले भने, ‘सामान खन्याएर लुकाएर राखिएको अवस्थामा टिपर भेटिएको छ । चालक फरार छन् ।’ हुलियाको आधारमा चालकको खोजी भइरहेको उनले बताए ।
