(बुटवल) लिपुलेक, कालापानी लगायत नेपाली भूभागलाई भारतले आफ्नो नक्सामा समेटेको विरोधमा बुटवलमा ‘गो व्याक इण्डिया’ को नारा घन्किएकोे छ ।

बुटवलमा क्रियाशिल गोर्खाली युवा सशक्तिकरण संस्थाको नेतृत्वमा बुटवलमा बिहीबार विरोध प्रर्दशन भएको हो ।

नेपालको एक चिम्टी माटो कसैले छुन नपाउने भन्दै सरकारले कुटनीतिक रुपमा समस्या समाधानको पहल गर्नुपर्ने अन्यथा आन्दोलन चर्काउने गोर्खालीका अध्यक्ष भरत पुरीले चेतावनी दिए । बुटवल बजारमा निकालिएको र्‍यालीपछि पुष्पलाल पार्कमा  कोणसभा भएको थियो । सभामा बोल्दै सहभागीहरुले भारतलाई यथाशिघ्र आफ्नो गल्ति सुधार्न चेतावनी दिएका थिए ।

उनीहरुले भारतीय विस्तारवाद, हेपाह प्रवृत्ति तथा अतिक्रमणकारी रवैया प्रति विरोध जनाउँदै तत्काल नक्सा सच्याउन सचेत गराएका थिए ।उनीहरुले गो व्याक इण्डिया, भारतीय सेना नेपाल छोड, खराब छिमेकी चाहिंदैन–नेपाली भूमि मिच्न पाईंदैन, हाम्रो भूमि हाम्रो देश प्राण भन्दा प्यारो छ लगायतका नारा लगाएका थिए ।

यस्तै नेपाल विद्यार्थी संघले पनि बुटवलमा राँके जुलुस निकालेर बिरोध प्रदर्शन गरेको छ ।