भक्तपुर : वर्षायाम सुरु भएसँगै मध्यपुर थिमि, सूर्यविनायक र भक्तपुरका बासिन्दाकाे दैनिकी त्रासमै बित्ने गरेकाे छ । वर्षामा हनुमन्ते नदीमा आएको बाढी गत वर्षजस्तै बस्तीमा पसेर वितण्डा मच्चाउला भन्ने डर र त्रासमा यहाँका बासिन्दा बसेका छन् । गत वर्ष २८ असारमा आएको भीषण वर्षाका कारण भक्तपुर नगरपालिकाको जगातीदेखि सल्लाघारीसम्म, मध्यपुरथिमि नगरपालिकाको राधेराधे क्षेत्र, कमेरोटार क्षेत्र, मध्यपुर अस्पताल, शंखधर चोक, अरनिको राजमार्ग, सागबारी, सूर्यविनायक नगरपालिकाका कटुन्जे, बालकोटलगायतका क्षेत्रमा हनुमन्तेको बाढी पस्दा सयाैं घर डुबानमा पर्नुका साथै करोडौंको क्षति भएको थियो ।

यस वर्ष हनुमन्ते काेरिडोर निर्माण सुरु भएसँगै हनुमन्तेको बाढी बस्तीमा नपस्ने आशामा बसेका यहाँका बासिन्दा भूमाफियाको चलखेलमा हनुमन्ते काेरिडोर निर्माण रोकिएसँगै उर्लिएको हनुमन्ते यस वर्ष पनि बस्तीमा पस्ने त्रासमा परेका छन् । अधिकारसम्पन्न बाग्मती सभ्यता एकीकृत विकास समितिले पहिलो चरणमा चार किलोमिटर काेरिडोर निर्माण गर्न  ८१ करोड रुपैयाँ लागतमा ठेक्का सम्झौता गरी २०७५ मंसिरदेखि हनुमन्ते काेरिडोरको निर्माण कार्य सुरु गरेकाे थियाे । असार मसान्तसम्म सम्पन्न गर्ने लक्ष्य रहेको हनुमन्ते काेरिडोर निर्माण असार लागेलगत्तै रोकिएको ठेकेदार पीएस गोल्डेन गुड समानान्तर जेभीका कम्पनी प्रबन्ध नीरज थपलिया बताउँछन् ।

उनले प्रमुख जिल्ला अधिकारीबाट काम सञ्चालन गर्ने आदेश र सुरक्षा पाए सुरु गर्न सकिने बताए । जिल्लाको चारवटै नगरपालिका भएर बग्ने बाग्मतीको सहायक नदीका रूपमा रहेको हनुमन्ते नदी नौ किलोमिटर लामो छ । तीन चरणमा दुई वर्षभित्र निर्माण सम्पन्न गर्ने लक्ष्य लिएको हनुमन्ते काेरिडोर पहिलो चरणमै काम रोकिएको हो । नदीको बहाव क्षेत्र २० मिटर, दायाँबायाँ २०–२० मिटरको फुटपाथसहितको सडक गरी ६० मिटर फराकिलो काेरिडोर निर्माणसँगै नदीको दुवैपट्टि ढुंगाको अग्लो पर्खाल निर्माण गरी नदीको पानी बस्तीमा पस्नबाट रोक्ने गरी हनुमन्ते काेरिडोर निर्माण कार्य अगाडि बढाएको सांसद महेश बस्नेतले बताए ।

भक्तपुरलाई बाढी र डुबानबाट जोगाउने, जाममुक्त भक्तपुर बनाउने, अरनिको राजमार्गको वैकल्पिक मार्गका रूपमा विकास गर्नेसमेत विभिन्न योजनासहित आएको हनुमन्ते कोरिडोर निर्माण रोकेर विकासमा अवरोध पुर्याउनु गलत भएको उनले बताए । उनले समस्या भए छलफल र सहमतिबाट टुंग्याउनुपर्ने बताउँदै विकासलाई यत्तिकै रोकेर राख्न खोजे विकासविरोधी तत्त्वलाई पन्छाएर काम अगाडि बढाइने बताए । मध्यपुरथिमि नगरपालिका क्षेत्रमा सञ्चालित ब्लक कारखानाले पर्खाल लगाएर दुई दशकदेखि कब्जा गर्दै आएको करोडौं मूल्य पर्ने सात रोपनी सार्वजनिक जग्गा झिक्न पर्खाल भत्काएपछि भूमाफियाको चलखेलले हनुमन्ते काेरिडोरको काम रोकिएको स्थानीयको गुनासो छ ।

राधेराधेबाट बिनाअवरोध निर्माण हुँदै गएको काेरिडोर ब्लक कारखानाअगाडि पुगेपछि रोकिएको बताउँदै स्थानीय सरोकारवाला दामोदरप्रसाद श्रेष्ठले सार्वजनिक जग्गा हडप्न खोज्ने भूमाफियाले सांसदसमेतलाई प्रयोग गरी शक्तिको आडमा केही व्यक्तिको परिचालन गरी काेरिडोर निर्माण रोकेको बताए । स्थानीय जम्मबरबहादुर केसीले वर्षौंदेखि आफ्नो जग्गामा खोला बग्दा हाँसेर बस्नेहरू अहिले विकास रोक्न आएको बताउँदै पीडित जग्गाधनीले राहत पाउने बेलामा एक आना पनि जग्गा नभएका भूमाफिया काेरिडोर रोकेर समस्या सिर्जना गर्न आएको बताउँछन् ।

मध्यपुरथिमि नगरपालिका राधेराधेकी सुमित्रा थापाले हनुमन्ते काेरिडोर निर्माण रोकिएपछि बस्तीमा बाढी पस्ला भनेर रातभरि निदाउन नसकेको बताउँदै बाढी पसेर क्षति भए काेरिडोर निर्माण रोक्ने व्यक्तिले जिम्मा लिनुपर्ने बताए । चारदोबाटो बालकोटका कुखुरा व्यवसायी मनोहर खत्रीले गत वर्ष बाढी पसेर आफ्नो खोरमा बिक्री गर्न तयार पारेको २ सय कुखुरा बगाएको बताउँदै यस वर्ष थप त्रास भएको बताए । लामो समयदेखि रहँदै आएको नदीको धार परिवर्तन गर्ने र सिमांकनको विवादलाई सम्बन्धित जग्गाधनी, सांसद, विभिन्न राजनीतिक दलका नेता, सूर्यविनायक नगरपालिका र मध्यपुरथिमि नगरपालिकाका प्रमुख, बालकोटका वडाध्यक्षसहित पटक–पटकको छलफलले ल्यान्डपुलिङको माध्यमबाट सबै समस्या समाधान गर्दै हनुमन्ते काेरिडोर निर्माण गर्ने सहमतिअनुसार काम अगाडि बढेको थियो ।

सहमतिअनुसार नै सूर्यविनायक नगरपालिका र मध्यपुरथिमि नगरपालिकाले संयुक्त रूपमा तयार पारेको नक्साको आधारमा दीर्घकालीन समस्या समाधान गर्ने गरी नदीको बहावलाई व्यवस्थित गर्दै जग्गाको विवाद ल्यान्डपुलिङको माध्यमबाट समाधान गर्ने, अतिक्रमण भएका सार्वजनिक जग्गा फिर्ता गरी व्यवस्थित गरिने सहमतिअनुसार नै काम अगाडि बढेको हो । यसबारे सूर्यविनायक नगरपालिका प्रमुख वासुदेव थापाले रोकिएको हनुमन्ते काेरिडोर पुनः सुरु नभए गत वर्षजस्तै बस्ती डुबानमा पर्ने जोखिम रहेको बताउँदै निर्माण पुनः सुरु गर्ने पहल भइरहेको बताए ।

मध्यपुरथिमि नगरपालिकाका प्रमुख मदनसुन्दर श्रेष्ठले समस्या भए समाधान खोज्नुपर्ने बताउँदै काम नै रोकेर राख्न भने नहुने बताए । सूर्यविनायक नगरपालिका–३ बालकोटका वडाध्यक्ष शिवशरण खत्री सबैको सहमतिमा समस्या समाधान भए पनि अहिले आर्थिक चलखेल गर्न काेरिडोर निर्माण नै रोक्नु गलत भएको बताउँदै बस्ती डुबानमा परे रोक्नेले जिम्मेवारी लिनुपर्ने बताए ।

            रासस