वीरगञ्ज नाका हुँदै चालु आर्थिक वर्षको १० महिनामा पेट्रोलियम पदार्थको आयात उल्लेख्य रूपमा वृद्धि भएको छ। भन्सार तथ्यांकअनुसार यस अवधिमा १ खर्ब ८१ अर्ब ७० करोड रुपैयाँ बराबरका पेट्रोलियम पदार्थ आयात भएका छन्। यो गत आर्थिक वर्षको सोही अवधिको तुलनामा २५ अर्ब ५३ करोड रुपैयाँ अर्थात् १६.३५ प्रतिशतले बढी हो।

वीरगञ्ज भन्सार कार्यालयका सूचना अधिकारी उदयसिंह विष्टका अनुसार चालु आर्थिक वर्षको १० महिनामा पेट्रोलियम पदार्थ आयातबाट मात्रै ६७ अर्ब १९ करोड रुपैयाँ राजस्व संकलन भएको छ।

त्यसैगरी डिजेल आयाततर्फ ८ लाख ९५ हजार २४६ किलोलिटर बराबरको १ खर्ब ५७ करोड रुपैयाँको आयात भएको छ। गत आर्थिक वर्षको सोही अवधिमा ९ लाख ८५७ किलोलिटर बराबर ७९ अर्ब ५७ करोड रुपैयाँको डिजेल आयात भएको थियो।

पेट्रोल आयाततर्फ ३ लाख ९० हजार ६१५ किलोलिटर बराबर ३५ अर्ब ७९ करोड रुपैयाँको आयात भएको छ। यो गत वर्षको सोही अवधिको ३ लाख ६७ हजार ३४४ किलोलिटर र ३१ अर्ब ७१ करोड रुपैयाँको तुलनामा वृद्धि हो।

एलपीजी ग्यासतर्फ भने कमी देखिएको छ। चालु आवमा २४ करोड २७ लाख ३ हजार १५० किलोग्राम बराबर २५ अर्ब ५४ करोड रुपैयाँको एलपीजी आयात भएको छ। गत वर्ष सोही अवधिमा २६ करोड ४१ लाख १४ हजार ३२६ किलोग्राम बराबर ३० अर्ब २८ करोड रुपैयाँको आयात भएको थियो।

समग्रमा पेट्रोलियम पदार्थको आयात मूल्यमा वृद्धि देखिए पनि केही इन्धन, विशेषगरी एलपीजी ग्यासको आयात परिमाण र मूल्य दुवै घटेको तथ्यांकले देखाएको छ।