काठमाडौं । नेपाल विद्युत् प्राधिकरणले यो वर्षको तिहारमा लोडसेडिङ नहुने स्पष्ट गर्दै उपभोक्तालाई ढुक्क भएर उज्यालोको पर्व मनाउन आग्रह गरेको छ। तिहारको समयमा विद्युत् आपूर्तिमा कुनै समस्या नआउने प्राधिकरणको दाबी छ।

प्राधिकरणका प्रवक्ता राजन ढकाल का अनुसार तिहारमा उद्योगधन्दा बन्द हुने भएकाले ठूलो मात्रामा बिजुली बचत हुन्छ, जसलाई घरायसी प्रयोजनका लागि सहजै आपूर्ति गर्न सकिनेछ।

> “पहिले तिहारमा विशेषगरी लक्ष्मी पूजामा बढी लोड पर्छ भन्ने बुझाइ थियो,” प्रवक्ता ढकालले भने, “तर अहिले उद्योगहरू बन्द हुँदा समग्र प्रणालीमा लोड घट्छ। विद्युत् खेर जाने अवस्थामा छ, जसले गर्दा जति पनि बत्ती बाल्न सकिन्छ।”

ढकालका अनुसार तिहारमा उद्योगहरू बन्द हुँदा दैनिक २०० देखि ३०० मेगावाट विद्युत् बचत हुने अनुमान गरिएको छ, जुन घरायसी उपभोक्तालाई आपूर्ति गरिनेछ।

प्राधिकरणले प्राविधिक गडबडी नआउन उच्च सतर्कता अपनाइएको जनाएको छ। सम्भावित समस्या समाधानका लागि **विशेष प्राविधिक टोली तयारी अवस्थामा** राखिएको छ।

> “प्राविधिक समस्या बाहेक अन्य कारणले बत्ती जाँदैन,” ढकालले भने।

विगतका वर्षहरूमा तिहारको समयमा, विशेषगरी लक्ष्मी पूजाको दिन, विद्युत् माग १६ सय मेगावाटसम्म** पुग्ने गरेको थियो। यस वर्ष पनि **माग सोही हाराहारीमा** रहने अनुमान गरिएको छ।

प्राधिकरणले आपूर्ति थप विश्वसनीय बनाउन प्रसारण लाइन विस्तार, सबस्टेसन स्तरोन्नति र पूर्वाधार निर्माणलाई तीव्रता दिएको जनाएको छ।