काठमाडौं । अन्तर्राष्ट्रिय फुटबल महासंघ (फिफा) का अध्यक्ष ज्यानी इन्फान्टिनोले प्रतियोगितामा निजी लगानी भित्र्याउने विवादित योजनाका क्रममा भएको प्रक्रियागत त्रुटिप्रति माफी मागेका छन्। तर चौतर्फी आलोचना भइरहे पनि उनले अध्यक्ष पदबाट राजीनामा नदिने स्पष्ट पारेका छन्।

मोरक्कोको रबातस्थित फिफाको अफ्रिकी कार्यालयमा बुधबार बसेको व्यवस्थापन बोर्डको आकस्मिक बैठकपछि इन्फान्टिनोले आफ्नो गल्ती महसुस गरेको बताएका हुन्। बैठकपछि चार घण्टामा जारी गरिएको विज्ञप्तिमा फिफाका उच्च अधिकारीहरूले इन्फान्टिनोको नेतृत्वप्रति निरन्तर समर्थन रहने जनाएका छन्।

प्रतियोगितामा निजी लगानीकर्तालाई सहभागी गराउने उद्देश्यले प्रस्ताव गरिएको ‘फिफा फरवार्ड इन्टरप्राइज’ (एफएफई) योजनालाई पारदर्शिताको अभाव रहेको भन्दै युरोपेली फुटबल महासंघ (युइएफए) ले असन्तुष्टि जनाएको थियो। फिफाका महासचिव म्याथियास ग्राफस्ट्रोमले समेत घटनाक्रमलाई दुःखद र निन्दनीय बताएका थिए।

यद्यपि, बैठकपछि ग्राफस्ट्रोमसहित फिफा व्यवस्थापन बोर्डले इन्फान्टिनोको नेतृत्वमा पूर्ण विश्वास रहेको दोहोर्‍याएको छ। इन्फान्टिनो र ग्राफस्ट्रोमले फिफाका उपाध्यक्ष, काउन्सिल सदस्य तथा २११ सदस्य राष्ट्रका फुटबल संघलाई संयुक्त पत्र पठाउँदै प्रक्रियागत कमजोरीप्रति क्षमायाचना गरेका छन्। भविष्यमा यस्ता त्रुटि दोहोरिन नदिने प्रतिबद्धता पनि व्यक्त गरिएको छ।

इन्फान्टिनोले पुरुष र महिला विश्वकपलगायत प्रमुख प्रतियोगितामा निजी लगानी भित्र्याउने योजनाको समर्थन गरेबापत प्रत्येक सदस्य संघलाई ४ करोड अमेरिकी डलर उपलब्ध गराउने प्रस्ताव अघि सारेका थिए। तर उक्त प्रक्रिया फिफा काउन्सिल र सदस्य संघहरूलाई पर्याप्त जानकारी नदिई अघि बढाइएको भन्दै आलोचना भएको थियो।

विवाद बढेपछि क्यानडाका प्रधानमन्त्री मार्क कार्नीले इन्फान्टिनोप्रति विश्वास नरहेको बताएका छन् भने पूर्व फुटबल स्टार लुइस फिगोले उनको राजीनामा माग गरेका छन्।

५६ वर्षीय इन्फान्टिनोले भने सन् २०२७ मार्चमा मोरक्कोमा हुने फिफा अध्यक्ष पदको निर्वाचनमा चौथो कार्यकालका लागि प्रतिस्पर्धा गर्ने तयारी गरिरहेका छन्।