काठमाडौं — अन्तर्राष्ट्रिय फुटबल महासङ्घ (फिफा) का अध्यक्ष जियानी इन्फान्टिनोले फिफाको व्यावसायिक सम्पत्ति व्यवस्थापनका लागि प्रस्ताव गरिएको नयाँ सहायक कम्पनी फिफा फरवार्ड इन्टरप्राइज (एफएफई) कुनै सदस्य राष्ट्रका लागि बाध्यकारी नभई विश्व फुटबलको विकासलाई गति दिने पहल भएको बताएका छन्।

भिडियो सन्देशमार्फत इन्फान्टिनोले एफएफई गठनको उद्देश्य फुटबलबाट सिर्जना हुने व्यावसायिक मूल्यलाई प्रभावकारी रूपमा उपयोग गर्दै त्यसको प्रत्यक्ष लाभ विश्वभरका २११ सदस्य सङ्घसम्म पुर्‍याउनु रहेको बताए। उनका अनुसार प्रस्ताव फिफाको लोकतान्त्रिक प्रक्रियाअन्तर्गत सदस्य सङ्घहरूको मतदान तथा ३८ सदस्यीय फिफा परिषद्को अनुमोदनपछि मात्र कार्यान्वयन हुनेछ।

फिफाले हालै एफएफईमा आफ्नो बहुमत स्वामित्व कायम राख्दै अल्पमत हिस्सेदारी दीर्घकालीन लगानीकर्तालाई बिक्री गरेर करिब ४२ अर्ब अमेरिकी डलर जुटाउने योजना सार्वजनिक गरेको थियो। सञ्चारमाध्यमका अनुसार योजना स्वीकृत भए प्रत्येक सदस्य सङ्घले ४ करोड अमेरिकी डलर प्राप्त गर्ने प्रस्ताव गरिएको छ।

इन्फान्टिनोले प्रायोजन, प्रसारण अधिकार, इजाजतपत्र तथा अन्य व्यावसायिक गतिविधिलाई व्यवस्थित बनाउने उद्देश्यले एफएफई स्थापना गर्न लागिएको स्पष्ट पार्दै यसले प्रतियोगिता सञ्चालन, खेल तालिका, फुटबल प्रशासन वा खेलसम्बन्धी नियामक अधिकारमा कुनै असर नपर्ने बताए।

यद्यपि उक्त योजनाले युरोपेली फुटबल सङ्घ (युइएफए), उत्तर तथा मध्य अमेरिकी फुटबल महासङ्घ (कनकाकाफ) र एसियाली फुटबल महासङ्घ (एएफसी) लगायतका संस्थाबाट आलोचना खेपिरहेको छ। युइएफएले फुटबलको शासन र व्यावसायिक अधिकार बिक्रीका विषय नभएको भन्दै योजनाले "स्वीकार्य सीमाना पार गरेको" टिप्पणी गरेको छ। कनकाकाफ र एएफसीले पनि पर्याप्त परामर्शबिनै योजना अघि बढाइएको भन्दै असन्तुष्टि जनाएका छन्।

फिफाले भने एफएफईमाथि आफ्नो पूर्ण नियन्त्रण रहने र फुटबल प्रशासनसँग सम्बन्धित सम्पूर्ण निर्णय गर्ने अधिकार फिफामै सुरक्षित रहने स्पष्ट पारेको छ। संस्थाले एफएफईको प्रारम्भिक बजार मूल्य करिब २० अर्ब अमेरिकी डलर हुने विश्वास व्यक्त गरेको छ।

योजनाअनुसार प्रत्येक सदस्य सङ्घलाई एकपटकका लागि २ करोड अमेरिकी डलर बराबरको हिस्सेदारी खरिद गर्ने अवसर दिइनेछ। फिफाका अनुसार यो विशेषगरी आर्थिक रूपमा कमजोर सदस्य सङ्घका लागि महत्त्वपूर्ण अवसर हुन सक्छ।

यसबीच, केही अन्तर्राष्ट्रिय सञ्चारमाध्यमले इन्फान्टिनोले सन् २०३१ मा अध्यक्ष पदबाट बाहिरिएपछि एफएफईको नेतृत्व सम्हाल्न सक्ने सम्भावनाबारे चर्चा गरेका छन्। तर फिफाले त्यस्तो कुनै छलफल नभएको स्पष्ट पारेको छ।