विश्वकप २०२६ अन्तर्गत इङ्ल्यान्डविरुद्धको जितपछि अर्जेन्टिनाका दुई खेलाडीले प्रदर्शन गरेको एउटा ब्यानरले विश्व फुटबलमा नयाँ विवाद जन्माएको छ।

खेल सकिएपछि डिफेन्डर लिसान्ड्रो मार्टिनेज र मिडफिल्डर जियोभानी लो सेल्सोले समर्थकतर्फ अभिवादन गर्ने क्रममा ‘Las Malvinas Son Argentinas’ (माल्भिनास अर्जेन्टिनाकै हुन्) लेखिएको ब्यानर प्रदर्शन गरेका थिए। उक्त दृश्य सामाजिक सञ्जालमा तीव्र रूपमा भाइरल बनेसँगै अन्तर्राष्ट्रिय सञ्चारमाध्यममा पनि व्यापक चर्चा भएको छ।

यो सन्देश दक्षिण एटलान्टिक महासागरस्थित फकल्यान्ड (अर्जेन्टिनाले माल्भिनास भन्ने) टापुहरूलाई लिएर अर्जेन्टिना र बेलायतबीच दशकौँदेखि जारी रहेको सार्वभौमिकताको विवादसँग सम्बन्धित छ।

सन् १९८२ मा यी टापुका विषयमा दुई देशबीच ७४ दिनसम्म युद्ध भएको थियो। युद्धमा ६४९ अर्जेन्टिनी र २५५ बेलायती सैनिकको मृत्यु भएको थियो। अन्ततः बेलायतले टापुमाथिको नियन्त्रण कायम राखे पनि अर्जेन्टिनाले भने ती टापु आफ्नो भूभाग भएको दाबी गर्दै आएको छ।

फिफाको स्टेडियम आचारसंहिताले खेल मैदानभित्र राजनीतिक, धार्मिक वा विभेदकारी सन्देश भएका ब्यानर र सामग्री प्रदर्शन गर्न निषेध गरेको छ। यही कारण अर्जेन्टिनी खेलाडीले प्रदर्शन गरेको ब्यानरलाई लिएर फिफाले कुनै अनुशासनात्मक कारबाही गर्छ वा गर्दैन भन्ने विषय अहिले चर्चामा छ। यद्यपि यस घटनाबारे फिफाले हालसम्म कुनै आधिकारिक प्रतिक्रिया दिएको छैन।

विश्वकप २०२६ मा राजनीतिक सन्देशलाई लिएर विवाद भएको यो पहिलो घटना भने होइन। यसअघि इरानको खेलका क्रममा केही समर्थकले इरानको पूर्व–क्रान्तिकालीन झन्डा प्रदर्शन गरेपछि पनि विश्वकपमा राजनीतिक अभिव्यक्तिको सीमाबारे बहस भएको थियो।

अर्जेन्टिना अब जुलाई १९ मा हुने विश्वकप फाइनलमा स्पेनसँग भिड्ने तयारीमा छ। तर उपाधि भिडन्तअघि टोली खेलभन्दा बाहिरको विवादमा तानिएको छ। समर्थकहरूले ब्यानरलाई राष्ट्रिय गौरवको प्रतीक भनेका छन् भने आलोचकहरूले विश्वकपलाई राजनीतिक सन्देश दिने मञ्च बनाउन नहुने बताएका छन्।

अब सबैको नजर फिफाको सम्भावित निर्णयतर्फ केन्द्रित भएको छ।