विशेष अदालतले पोखरा अन्तर्राष्ट्रिय क्षेत्रीय विमानस्थल अनियमिततामा पूर्वमन्त्री दिवंगत पोस्टबहादुर बोगटी पत्नी राममाया बोगटीलाई तारेखमा बस्नु नपर्ने आदेश दिएको छ । विशेष अदालतका न्यायाधीशत्रय नारायणप्रसाद पौडेल, उमेश कोइराला र विदुर कोइरालाको इजलासले राममाया बोगटीलाई मुद्दाको तारेखमा नराख्ने आदेश दिएको हो ।

अख्तियार दुरुपयोग अनुसन्धान आयोगले अन्तर्राष्ट्रिय क्षेत्रीय विमानस्थल अनियमिततामा पूर्वमन्त्री पोस्टबहादुर बोगटीको हकमा राममाया बोगटीलाई विपक्षी बनाएर ८ अर्ब ३६ करोड ७३ लाख ५५ हजार २ सय ९७ रुपैयाँ ५० पैसा बिगो दाबी गर्दै भ्रष्टाचार मुद्दा दर्ता गरेको थियो । 

अख्तियारले बोगटी संस्कृति पर्यटन तथा नागरिक उड्डयन मन्त्री हुँदा सार्वजनिक खरिद ऐन २०६३ बमोजिम बाध्यकारी कानुनलाई नजरअन्दाज गर्दै सार्वजनिक खरिद अनुगमन कार्यालयको रायलाई नहेरी २०६९ माघ १५ को सञ्चालक समितिको २६९ औँ बैठकले सार्वजनिक खरिद ऐन २०६३ एवं सार्वजनिक खरिद नियमावली २०६३ विपरीत हुने गरी वार्ताको प्रस्ताव स्वीकार गरी स्वीकृतिका लागि मन्त्रालय पठाउने निर्णय गरेको अभियोग लगाएको छ ।