ललितपुरको हात्तिवन स्थित सिटी स्केप अपार्टमेन्टमा बसेर अनलाइन जुवा खेलाएको आरोपमा प्रहरीले ९ जनालाई पक्राउ गरेको छ । पक्राउ पर्नेमा ३ जना भारतीय नागरिक पनि छन् ।

मंगलबार अपार्टमेन्टको दुई वटा ब्लकबाट उनीहरूलाई पक्राउ गरिएको उपत्यका अपराध अनुसन्धान कार्यालयका एसपी मनोहर भट्टले बताए । पक्राउ पर्नेमा भारत घर भएका ३५ वर्षीय चेतन यादव, ३३ वर्षीय आशिष शर्मा, २१ वर्षीय रौनक सिंह, पूर्वी नवलपरासी घर भएका २६ वर्षीय सुजन दवाडी, तनहुँ घर भएका २४ वर्षीय निरोज राना र कास्कीका २६ वर्षीय आशिष रेग्मी छन् ।

त्यस्तै, प्रहरीले दाङ घर भएका २६ वर्षीय हार्दिक पोखरेल, लमजुङ घर भएका २५ वर्षीय सुरेश पराजुली र डोटी घर भएका २६ वर्षीय योगेन्द्र कुँवरलाई प्रहरीले पक्राउ गरेको छ । 

आरोपीहरूले ३१ करोड २४ लाख ३४ हजार कारोबार गरेको भेटिएको एसपी भट्टले बताए । अनलाइन सट्टेबाजी गराउने गिरोहको साथबाट प्रहरीले ८ थान ल्यापटप र २४ थान मोबाइल तथा ३१ थान सिमकार्ड बरामद गरेको छ । आरोपीहरूमाथि थप अनुसन्धान गर्न उपत्यका अपराध अनुसन्धान कार्यालयले उनीहरूलाई जिल्ला प्रहरी परिसर जावलाखेलमा पठाएको छ ।