१९ माघ, कीर्तिपुर (काठमाडौँ) । त्रिभुवन विश्वविद्यालयले स्थापनाकालदेखि बल्खुस्थित परीक्षा नियन्त्रण कार्यालयमा केन्द्रित रहेको परीक्षा प्रणालीलाई प्रदेशस्तरमा विकेन्द्रित गरेको छ।

वर्षौंदेखि देशका विभिन्न स्थानबाट परीक्षा दिन काठमाडौं आउनु पर्दा पर्ने झन्झट र आर्थिक भारबारे विद्यार्थीले आवाज उठाउँदै आएका थिए। पछिल्लो साता स्वतन्त्र विद्यार्थी युनियनले परीक्षा नियन्त्रण कार्यालय परिसरमा धर्ना दिएपछि विश्वविद्यालय प्रशासन र विद्यार्थीबीच सहमति भएको हो।

उक्त सहमतिअनुसार, यसअघि काठमाडौँमा सञ्चालन हुने भनिएको तीन वर्षे स्नातक तहको मौका परीक्षा अब सम्बन्धित विद्यार्थीको प्रदेशमै सञ्चालन गरिने भएको छ। परीक्षा माघ १८ गतेदेखि सुरु हुने भनिए पनि अब माघ २५ गतेदेखि प्रदेशअन्तर्गतका क्षेत्रीय परीक्षा नियन्त्रण कार्यालयमार्फत सञ्चालन गरिने विश्वविद्यालयले जनाएको छ।

परीक्षा नियन्त्रण कार्यालयद्वारा प्रकाशित सूचनाअनुसार परीक्षार्थीलाई पर्ने असुविधा तथा आर्थिक भारलाई मध्यनजर गर्दै प्रत्येक प्रदेशमा न्यूनतम एक परीक्षा केन्द्र रहने व्यवस्था मिलाइएको छ।

यसअनुसार मानविकी तथा सामाजिक शास्त्र, शिक्षा शास्त्र, व्यवस्थापन सङ्काय तथा विज्ञान तथा प्रविधि अध्ययन संस्थान अन्तर्गतका विद्यार्थीले आंशिक तथा मौका परीक्षा सम्बन्धित प्रदेशमै दिन पाउने छन्।

परीक्षा नियन्त्रक लक्ष्मण पौडेलले परीक्षा प्रणालीलाई क्रमशः विकेन्द्रित र सूचना प्रविधिमा आधारित बनाउँदै लैजाने नीति अनुसार यो व्यवस्था गरिएको बताए। तीन वर्षे स्नातक तहजस्तै अन्य तहका परीक्षाहरू पनि सम्भव भएसम्म प्रदेशमै सञ्चालन गरिने उनले जानकारी दिए।

यता, त्रिभुवन विश्वविद्यालय स्वतन्त्र विद्यार्थी युनियनका सभापति दीपकराज जोशीले विद्यार्थीहरूसँग भएको सहमतिअनुसार परीक्षा प्रणाली सुधारको प्रक्रिया अझै ढिलो भइरहेको टिप्पणी गरे।