मुम्बई । नेपाली राष्ट्रिय क्रिकेट टोलीका कप्तान रोहित पौडेलले टी–२० विश्वकपमा दबाब स्वाभाविक हुने र त्यसलाई सही रूपमा व्यवस्थापन गर्न सक्ने टोली नै सफल हुने बताएका छन्।

टी–२० विश्वकपअन्तर्गत इटलीसँग बिहीबार हुने खेलअघि मंगलबार मुम्बईमा आयोजित प्रि–म्याच प्रेस कन्फेरेन्समा कप्तान रोहितले पछिल्लो समय नेपालले पर्याप्त अन्तर्राष्ट्रिय खेल खेलेको अनुभवका कारण दबाब सम्हाल्न सक्षम रहेको बताए।
उनले भने, “विश्वकपमा खेल्दा दबाब अवश्य हुन्छ। दबाब जसले झेल्न सक्छ, उही सफल हुन्छ। हामीले धेरै दर्शकको अगाडि खेल्दै आएका छौँ र त्यसका लागि तयार छौँ।”

इंग्ल्यान्डसँगको पछिल्लो खेलले कठिन परिस्थितिमा निर्णय लिने र दबाब झेल्ने विषयमा महत्वपूर्ण सिकाइ दिएको रोहितको भनाइ छ।
“इंग्ल्यान्डसँगको खेलपछि क्रन्च सिचुएसनमा कसरी निर्णय लिने भन्नेमा धेरै कुरा सिकेका छौँ। आगामी खेलमा त्यसैअनुसार योजना बनाउनेछौँ,” उनले भने। रोहितले टोलीको आत्मविश्वास उच्च रहेको र आगामी खेलमा अझ राम्रो प्रदर्शन गर्ने विश्वास व्यक्त गरे।

वेस्ट इन्डिज र स्कटल्यान्डजस्ता टोलीहरूसँग खेल्दा योजनाको प्रभावकारी कार्यान्वयन र दबाब व्यवस्थापन अत्यन्तै महत्वपूर्ण हुने उनले बताए। साथै, इटलीलाई पनि हल्का रूपमा नलिने स्पष्ट पारे।
“विश्वकप खेल्ने सबै टोली सक्षम हुन्छन्। पछिल्लो समय इटलीले पनि राम्रो प्रदर्शन गरेको छ, त्यसैले हामी सतर्क छौँ,” रोहितले भने।

इटली पहिलो खेलमा पराजित भएर वाङ्खडे स्टेडियममा खेल्न आउँदै छ। नेपालले भने समूह चरणका सबै खेल मुम्बईस्थित वाङ्खडे स्टेडियममै खेल्नेछ। एउटै मैदानमा सबै खेल खेल्न पाउनु नेपालका लागि फाइदाजनक हुने कप्तान रोहितको भनाइ छ।
“वाङ्खडे मैदानको विकेट हाम्रो टोलीका लागि सुहाउँदो छ। यहाँ सबै खेल खेल्न पाउनु प्लस प्वाइन्ट हो,” उनले भने।

रोहितले नेपाली टोलीले अपेक्षाअनुसार अन्तर्राष्ट्रिय एक्सपोजर नपाएको गुनासो समेत गरे।
“गत टी–२० विश्वकपपछि टेस्ट राष्ट्रसँग एउटा मात्र शृंखला खेल्यौँ। वर्षमा ६–७ नभए पनि २–३ वटा नियमित शृंखला भए हाम्रो विकासका लागि ठूलो सहयोग पुग्नेछ,” उनले बताए।

इंग्ल्यान्डसँगको प्रदर्शनपछि नेपाली टोलीले अन्तर्राष्ट्रिय स्तरमा चर्चा पाएको उल्लेख गर्दै रोहितले अस्ट्रेलिया, इंग्ल्यान्ड र भारतजस्ता ठूला टोलीलाई नेपालमा खेल्न स्वागत रहेको बताए।
“ठूला टोलीहरू कीर्तिपुर आएर खेल्नु हाम्रो क्रिकेटका लागि ऐतिहासिक हुनेछ। यसले खेलको विकासमा ठूलो योगदान पुर्‍याउँछ,” उनले भने।

कप्तान रोहितले नेपाल प्रिमियर लिग (एनपीएल) ले खेलाडीहरूलाई राम्रो एक्सपोजर दिएको उल्लेख गर्दै विश्वकपको प्रदर्शनका आधारमा केही खेलाडीले इन्डियन प्रिमियर लिग (आईपीएल) मा पनि अवसर पाउन सक्ने विश्वास व्यक्त गरे।

इंग्ल्यान्डसँगको खेलपछि पेस बलर नन्दन यादवले समर्थकसँग माफी मागेको विषयमा सोधिएको प्रश्नमा रोहितले उनी भावनात्मक अवस्थामा त्यसो गरेको हुनसक्ने प्रतिक्रिया दिए।