रास्वपाका वरिष्ठ नेता बालेन शाह कर्णाली प्रदेशको यात्रालाई सुर्खेतबाट छोट्याएर शनिबार काठमाडौं आइपुगेका छन् । यात्राका क्रममा अछाममा गम्भीर घाइते भई टोखास्थित ग्राण्डी अस्पतालमा भर्ना गरिएका सञ्चारकर्मी दिनेश सिटौलाको परिवारलाई उनले दिउँसो १२ बजे भेट गरे ।

सिटौलाको स्थिति गम्भीर रहेको र भेट्न नमिलेपछि भाइ उमेश सिटौलासँग भेटेर बालेन बनस्थलीस्थित घण्टीघर पुगेका छन् । उनले सिटौलाको स्थिति जटिल रहेको जानकारी पाएको भन्दै आइतबार विहान ७ बजेसम्म धैर्य गर्न परिवारका सदस्यलाई आग्रह गरेका थिए ।

अछाममा लडेर घाइते भएका सञ्चारकर्मी दिनेश सिटौलाकोअवस्था गम्भीर छ । चलचित्र पत्रकार संघका अध्यक्ष समिर बलामीका अनुसार टोखास्थित ग्रयाण्डी अस्पतालका चिकित्सकले शनिबार दिनभरिमा स्वास्थ्यस्थितिका जानकारी दिने बताएका छन् । सिटौला उक्त संघका निवर्तमान अध्यक्ष हुन् ।

बालेनको आग्रहलाई सिटौलाका विदेशबाट फर्किएका दाइले मानेका छन्, तर यहीँ रहेका भाइले जेजस्तो अवस्था हो, त्यसको जानकारी अहिले नै चाहिने भनिरहेका छन् ।

बालेन केही दिन काठमाडौंमै रहने उनी निकटका रास्वपा नेता मधुसुधन ढकालले बताए । उनलाई बालेनले सुर्खेतबाट काठमाडौं आउनुअघि फोन गरेका थिए । नुवाकोटको चुनावी अभियानमा रहेका ढकाललाई आफू केही दिन काठमाडौं रहने भनेको उनले बताए ।

सुर्खेतबाट बालेनसँगै काठमाडौं आएका कलाकार अर्जुन घिमिरे (पाँडे) ले उनी पार्टी सभापति रवि लामिछानेसँगको भेटमा रहेको र सरसल्लाहपछि कहिले उपत्यका बाहिरका कार्यक्रममा जाने भन्ने कुरा तय हुन्छ ।