काठमाडौं, १४ मंसिर – नेपाल प्रिमियर लिग (एनपीएल) अन्तर्गत आजको खेलमा कर्णाली याक्सले टस जितेर पहिले ब्याटिङ गर्ने निर्णय गरेको छ। कर्णाली याक्सका कप्तान सोमपाल कामीले टस जितेर काठमान्डु गोर्खाजलाई फिल्डिङको निम्तो दिएका हुन्।

आजको खेलमा काठमान्डु गोर्खाजले एक परिवर्तन गरेको छ। दिपेश कँडेलको स्थानमा भीम सार्की टोलीमा सहभागी छन्, भने कर्णाली याक्सले अघिल्लो खेलकै टोलीलाई निरन्तरता दिएको छ।

करण केसीको नेतृत्वमा रहेको काठमान्डु पाँच खेल खेलेकोमा दुई खेलमा जित प्राप्त गरी ४ अंकसहित तेस्रो स्थानमा रहेको छ। प्लेअफमा पुग्नका लागि काठमान्डुका लागि आजको खेल महत्त्वपूर्ण मानिन्छ।

अर्कोतर्फ, चार खेल खेलिसकेको कर्णाली याक्सले केवल एक खेलमा मात्रै जीत हासिल गरेको छ र दुई अंकसहित छैटौं स्थानमा छ। प्लेअफमा रहिरहनका लागि कर्णाली याक्सलाई आजको खेलमा जित सुनिश्चित गर्नु जरूरी छ।