७ कात्तिक, काठमाडौं । अमेरिकी खाद्य तथा औषधि प्रशासन (एफडीए) ले बेलायती औषधि निर्माता कम्पनी जीएसकेको रक्त क्यान्सर उपचार औषधि ‘ब्लेंरेप’लाई संयोजन उपचारका लागि पुनः स्वीकृति दिएको छ ।

एफडीएले ब्लेंरेपलाई मल्टिपल मायलोमा (रक्त क्यान्सरको एक प्रकार) का बिरामीका लागि बोर्तेजोमिब र डेक्सामेथासोनसँग संयोजनमा प्रयोग गर्न अनुमति दिएको हो । यो उपचार ती बिरामीका लागि हो जसको रोग अघिल्लो उपचारपछि फर्किएको छ वा औषधिले काम गर्न छाडेको छ ।

यो स्वीकृतिसँगै करिब तीन वर्षअघि बजारबाट हटाइएको ब्लेंरेप पुनः बजारमा फर्कने बाटो खुलेको जीएसकेले जनाएको छ ।

अन्तिम चरणका दुई परीक्षणपछि आएको निर्णयमा एक अध्ययनले उक्त संयोजनले मृत्युको जोखिम ५१ प्रतिशतले घटाउने र रोग नबढी बाँच्ने समय जोन्सन एन्ड जोन्सनको डारजालेक्सभन्दा तीन गुणा बढाउने नतिजा देखाएको थियो ।

ब्लेंरेप सन् २०२२ मा बजारबाट हटाइएको थियो, किनभने यसको परीक्षणले पहिलेदेखिको उपचारभन्दा राम्रो प्रदर्शन गर्न सकेको थिएन । तर, नयाँ परीक्षण नतिजा सकारात्मक आएपछि एफडीएले पुनः स्वीकृति दिएको हो ।

जीएसकेका अनुसार यो औषधि सरलीकृत सुरक्षा अनुगमन कार्यक्रम (simplified safety monitoring program) अन्तर्गत उपलब्ध हुनेछ, जसले विशेष गरी दृष्टि सम्बन्धी जोखिमको व्यवस्थापनमा सहयोग गर्नेछ ।

एफडीएको निर्णयले ब्लेंरेपको बिक्रीबाट ३ अर्ब पाउन्ड (करिब ४ अर्ब अमेरिकी डलर) भन्दा बढी आम्दानी हुने कम्पनीको अनुमानमा लगानीकर्ताको विश्वास बढाउने अपेक्षा गरिएको छ ।

ब्लेंरेपलाई बेलायत, जापान, क्यानडा र स्विट्जरल्याण्डसहितका देशहरूले पहिले नै स्वीकृति दिइसकेका छन् ।

जीएसकेका प्रमुख वैज्ञानिक टोनी वुडका अनुसार, मल्टिपल मायलोमाको बजार सन् २०३२ सम्ममा ४५ अर्ब डलर पुग्ने अनुमान छ, र ब्लेंरेपले कम्पनीको आगामी तीन–चार वर्षको वृद्धि दरमा महत्त्वपूर्ण योगदान पुर्‍याउने अपेक्षा गरिएको छ ।

जीएसकेले हाल औषधिको प्रारम्भिक कार्यान्वयन र लन्च तयारीमा रहेको बताएको छ ।