एमाले, माओवादी, नेकपा एकीकृत समाजवादी आबद्ध र स्वतन्त्र २८ युवाहरूले जेन-जी आन्दोलनको माग र सन्देशलाई राजनीतिक दलहरूले नजरअन्दाज गरेको बताएका छन्  । जेन-जी आन्दोलनको सन्देशलाई नसुन्नु घातक हुने उल्लेख गर्दै दलहरू बदलिनुको विकल्प नभएको संयुक्त विज्ञप्तिमार्फत बताएका छन् ।

‘जेन-जी आन्दोलनको माग र सन्देश स्पष्ट छ : नेपालीहरू राजनीति, प्रशासन र न्यायपालिकालगायत भ्रष्टाचार मुक्त, पारदर्शी र परिणाममुखी भएको देख्न चाहन्छन्, त्यसका लागि राजनीतिक दलहरू जिम्मेवार बनून् भन्ने चाहन्छन्, राजनीतिमा नेतृत्वको हस्तान्तरण–पुस्तान्तरण सहज तथा स्वाभाविक होस् भन्ने चाहन्छन् । तर मुख्य राजनीतिक दलका नेताहरूले अझै पनि उक्त सन्देश नसुनेझैँ गरेका छन्,’ उनीहरूले भनेका छन्, ‘विभिन्न बहाना गरेर फेरि पनि नेतृत्वमा रहने छलछाम गर्दैछन् । आन्दोलनको सन्देशलाई नसुन्नु वा नबुझ्नु घातक हुनेछ । यस्तो बहानाबाजीले मुलुकलाई अझै ठूला दुर्घटनातर्फ घकेल्ने छ ।’

युवाहरूले राजनीतिक दलहरूको पुनर्गठन, असफल नेतृत्वको बिदाइ नगरी समस्याको सधान नहुने जनाएका छन् । ‘राजनीतिक दलहरूमा पुनर्गठन, जनतामा आशा र विश्वासको सिर्जना, ती दलहरूको लोकतान्त्रिक सहकार्य, नयाँ निर्वाचन एउटा बाटो हो । दलहरूमा अलमल, पुरानै नेताहरूको निरन्तरता, समाजमा अन्योल, निराशा र आक्रोश बढाउने शक्तिहरूको बोलबाला, बाहिरी शक्तिहरूको चलखेल र अस्थिरताको दुश्चक्र अर्को बाटो हो,’ उनीहरूको भनाइ छ, ‘राजनीतिलाई लोकतान्त्रिक प्रक्रियामा अगाडि बढाउन दलहरूको पुनर्गठन आजको मुख्य सर्त हो । लामो समय नेतृत्वमा बसेर राजनीतिलाई असफल बनाइरहेका मुख्य पात्रहरूलाई बिदा नगरिकन दलहरूको पुनर्गठन हुनै सक्दैन ।’

दलहरूलाई पुनर्गठन गर्ने काममा कुनै पनि ढिलाइ नगर्न सबै राजनीतिक दलका जिम्मेवार सदस्यहरूलाई उनीहरूले आग्रह गरेका छन् । उनीहरुले संविधानलाई असफल बनाउने र मुलुकलाई फेरि भूराजनीतिक दबाब र अस्थिरतातर्फ धकेल्ने कुनै पनि गतिविधिले आन्दोलनलाई बदनाम र असफल बनाउने कुरामा जेन-जीहरू सचेत रहेको उनीहरूको भनाइ छ ।

यसरी माग गर्नेहरूमा अरविन्द सिंह, अभिजित अधिकारी, अशेष घिमिरे, उषाकिरण तिम्सेना, करुणा पराजुली, जटिल कार्की, जेबी विश्वकर्मा, नवीन तिवारी, निराजन पौडेल, पासाङ डोल्मा, प्रकाश देवकोटा, प्रकाश पौडेल, प्रकाश श्रेष्ठ, प्रतीक कार्की, भरत महतारा, भावना घिमिरे, भावना शाह, ममता अधिकारी, महेश पाण्डेय, राजेश राई, राजेन्द्र परियार, राधिका परियार, रोमश खतिवडा, रोशन रिमाल, विराज थापा, समकृती पुन, सवल दाहाल र सन्दीप पुन छन् ।