काठमाडौं । सत्तारुढ प्रमुख घटक नेकपा एमालेका अध्यक्ष केपी शर्मा ओलीले सरकारले ल्याएको आगामी आर्थिक वर्षको बजेटप्रति असन्तुष्टि व्यक्त गर्नुभएको छ।

सत्तारुढ दलहरुसँग परामर्श नगरी बजेट ल्याइएको भन्दै उहाँले असन्तुष्टि व्यक्त गर्नुभएको हो। शनिबार संसद भवनको ल्होत्से हलमा बसेको पार्टी संसदीय दलको बैठकलाई सम्बोधन गर्दै उहाँले अर्थमन्त्री वर्षमान पुनले नेकपा माओवादी केन्द्रप्रति ढल्किएको बजेट ल्याएको टिप्पणी गर्नुभयो ।

बजेट समाजवाद उन्मुख हुनुपर्नेमा अन्योलग्रस्त देखिएको उल्लेख गर्दै उहाँले बजेट निर्माणमा प्रक्रियामा नै कमी कमजोरी सरकारले गरेको दावी गर्नुभएको छ । अध्यक्ष ओलीले बजेटमा कमी भएको औंल्याए पनि सोही बजेटलाई समर्थन र पारित गरेर जाने एमालेको नीति रहेको पनि स्पष्ट पार्नुभयो। सरकारले प्रस्तुत गरेको बजेटमाथि आफ्नो पार्टीले खुलेर छलफल गर्न चाहेको पनि उहाँको भनाइ छ । 

उहाँले भन्नुभयो,-‘अहिले हामीसँग प्रश्तुत भएको बजेट वक्तव्यसँग सम्बन्धित र खासगरी करका दरहरुसँग सम्बन्धित खास गरी भन्सार, आयकरसम्बन्धी अरू विभिन्न प्रकारका करहरु सम्बन्धि या सम्पूर्ण आयको अनुमान सम्बन्धी, व्ययका क्षेत्रहरु र अनुमानमा आधारित भएर कस्तो खालको दिशा बजेटले समेटेको छ । हामी जानुपर्ने कता हो ? सैद्धान्तिक रुपमा कस्तो दिशा समातेको छ ? यी विषयहरुमा केन्द्रित भएर छलफल गर्नेछौं। अरु छलफल बाँकी रहन्छ। रकमको बाँडफाँड पनि त्यस्तै गरेर अलि बढी एकातिर ढल्किएको खालको जस्तो देखिन्छ। यो कमी रहेको छ। एउटा चाहीं हामीमा कुनै दुविधा हुनुहुँदैन– यस बजेटलाई हामी समर्थन गर्छौं। र पारित गर्छौं।'

बजेटमा समर्थन गरेर अघि बढ्न पनि पार्टीका सांसदहरुलाई अध्यक्ष ओलीले निर्देशन दिनुभयो।