काठमाडौं । उपप्रधान एवं गृहमन्त्री रवि लामिछानेले राजस्व चुहावट र अवैध ओसारपसार नियन्त्रणमा परिणाम देखिने गरी काम गर्न सुरक्षा निकायका अधिकाहरुलाई निर्देशन दिनुभएको छ ।

विराटनगरमा आइतबार आयोजित राजस्व अभिवृद्धि तथा चुहावट नियन्त्रण सम्बन्धी प्रदेशस्तरीय छलफल तथा अन्तरक्रियामा उहाँले राजस्व चुहावट नियन्त्रणमा निर्देशन दिनुभएको हो ।

लक्ष्य अनुसार राजस्व संकलन हुन नसक्नु, चुहावट बढ्नुका कारणको बारेमा जानकारी हुँदाहुँदै सरकारी निकायबीचको समन्वय र सम्बद्ध अधिकारीकै तदारुकता अभावमा लक्ष्य अनुसारको प्रतिफल प्राप्त नभएको उहाँको भनाइ छ ।

सबै कार्यालयका प्रमुखले कानूनले दिएको अधिकार मात्रै निर्धक्क प्रयोग गर्ने हो भने अधिकांश समस्या समाधान हुने बताउँदै उहाँले कर्मचारीले आफ्नो कार्यकालमा गर्ने कामको प्राथमिकता निर्धारण गरे मात्र प्रतिफल आउने दावी गर्नुभएको हो । 

अधिकार प्रयोगमा हिचकिचाउने र जिम्मेवारीबाट पन्छिने कर्मचारीविरुद्ध कठोर हुने गृहमन्त्री लामिछानेले चेतावनी दिनुभयो ।