काठमाडौं । प्रधानमन्त्री पुष्पकमल दाहालले ऊर्जा क्षेत्रको विकासमा नेपाल सरकार दृढतापूर्वक अगाडि बढिरहेको र विद्युत व्यापारमा नेपालले नयाँ इतिहास बनाउने बताउनुभएको छ ।

संखुवासभाको अरूण-३ जलविद्युत परियोजनाको ब्रेक-थ्रू कार्यक्रमलाई मंगलबार सम्बोधन गर्दै उहाँले यस्तो बताउनुभएको हो । ऊर्जा क्षेत्रको प्रवर्द्धनका लागि सरकारले आर्थिक वर्ष २०८१/०८२ को बजेटमा निजी क्षेत्रको लगानी आकर्षित गर्ने पर्याप्त प्रावधान ल्याएको उहाँले बताउनुभयो ।

सुक्खायामको माग पूर्ति गर्न बुढीगण्डकी, दूधकोशी र नलसिङ्गाड जलाशययुक्त जलविद्युत आयोजना तथा नौमुरे बहुउद्देश्यीय जलविद्युत आयोजनाको निर्माण कार्य सुरू गर्ने तयारी गरेको उहाँले बताउनुभएको छ । वैदेशिक रोजगारीमा गएका व्यक्तिको लगानीमा घुन्सा र सिम्बुवा जलविद्युत आयोजना निर्माण कार्य अगाडि बढाइने उहाँले जानकारी दिनुभयो।

प्रधानमन्त्री दाहालले शून्य कार्बन उत्सर्जनको लक्ष्य हासिल गर्न जीवाश्म ऊर्जालाई स्वच्छ एवं नवीकरणीय ऊर्जाले क्रमशः विस्थापन गर्ने, त्यसका लागि हरित हाइड्रोजन प्रवर्द्धन गर्न अनुसन्धान र विकासका लागि आवश्यक बजेटको व्यवस्था गरिएको बताउनुभएको छ । 

अरूण–३ जलविद्युत परियोजनाको प्रसारण लाइन निर्माण, जग्गा प्राप्तिका लागि स्थानीय सरोकारवाला पक्षबीच सहमति हुनुपर्नेमा जोड दिंदै उहाँले यस विषयलाई गम्भीरतापूर्वक लिई आवश्यक सहजीकरणका निम्ति स्थानीय तहमा क्रियाशील राजनीतिक दलहरू, नागरिक समाज र स्थानीय जनसमुदायमा विशेष आग्रह गर्नुभयो ।

विकास-समृद्धि देशको साझा लक्ष्य भएको बताउँदै प्रधानमन्त्री दाहालले विकास र समृद्धिको यात्रामा लामवद्ध हुन सबैलाई अपिल समेत गर्नुभएको छ ।