मधेशमा फोहोरको समस्या : फोहोर फाल्ने जग्गा किन्दा पनि पाइँदैन
फोहोर मैला व्यवस्थापन काठमाडौंजस्ता ठूला सहरको मात्र होइन, भर्खरै सहरीकरण हुन थालेका बजारको समस्या हो । पहाडी क्षेत्रको तुलनामा तराई मधेसमा फोहोर मैला अझै ठूलो समस्या हो । तराईका साना ठूला सबै बजारको साझा समस्या हो फोहोर मैला ।
स्थानीय सरकार सञ्चालन ऐन-२०७४ ले सरसफाइ र फोहोर मैला व्यवस्थापनको जिम्मेवारी स्थानीय तहलाई दिएको छ । तर स्थानीय तहले आफ्नो जिम्मेवारी पूरा नगर्दा सबैजसो सहरी क्षेत्रमा फोहोर मैला समस्या बन्ने गरेको छ । तराईका त गाउँपालिकामा नै पर्ने ससाना बजारमा पनि फोहोर मैला विकराल समस्या बनेको छ ।
देश संघीतामा गइसकेपछि आसपासका तत्कालीन गाविसलाई गाभेर कतिपय ठाउँमा नगरपालिका बनाइएको छ । नगरपालिका घोषणा भएसँगै सहरीकरण बढ्दो छ । तर त्यस अनुरुप फोहोर मैला व्यवस्थापनको काम हुन सकेको छैन । जसले समस्या बढ्दो छ ।
नयाँ नगरपालिका मात्रै हैन, पुराना नगरपालिकामासमेत फोहोरमैला व्यवस्थापनमा उदासिन छन् भन्ने उदाहरण बनेको छ रौतहटको गौर नगरपालिका । गौरमा तीन वटा ट्रयाक्टरमा दिनहुँ फोहोरमैला संकलन हुन्छ । तर फाल्ने ठाउँ भने गतिलो छैन । त्यसैले नगरपालिकाले बरवापुल नजिकै सिर्सिया रोडमा लगेर फोहोर फाल्दै आएको छ ।