सिड्नीमा बाढीको जोखिम
अस्ट्रेलियाको न्यू साउथ वेल्स राज्यमा ठूलो वर्षा नरोकिएपछि बाढीको जोखिमका कारण लगभग १८,००० मानिसलाई सुरक्षित स्थानमा सारिएको छ।
केही दिनदेखि भइरहेको अविरल वर्षाका कारण सिड्नीवरपर र दक्षिणपूर्वी राज्य क्वीन्सल्यान्डमा नदी र तटबन्धहरूमा पानीको बहाव बढेको छ।
अधिकारीहरूले ५० वर्षमा एक पटक हुने अवस्था यो साताभरि रहन सक्ने भन्दै नागरिकहरूलाई सचेत रहन आग्रह गरेका छन्। प्रधानमन्त्री स्कट मोरिसनले स्थानान्तरणका लागि बाध्य भएका मानिसका लागि कोषको व्यवस्था गर्दै देशका लागि अर्को परीक्षाको घडी भएको बताएका छन्।
कुनैकुनै स्थानमा १,००० मिलिमिटरसम्म पानी परेको मौसम विभागले जनाएको छ।
सोमवार बाढीका कारण १५० विद्यालय बन्द भए भने नदीहरू सन् १९६१ को विनाशकारी बाढीको समयभन्दा ठूलो भएको बताइएको छ।
