ताप्लेजुङ : पर्यटकीय क्षेत्र तीनजुरे मिल्के जलजलेको गुराँस संरक्षणका लागि स्थानीयलाई सुधारिएको फलामे चुलो वितरण गरिएको छ। स्थानीयले दाउराका रुपमा गुराँसको काठ प्रयोग गर्दा गुराँसका रुख काट्ने क्रम बढेको भन्दै कम दाउरा खपत हुने खालको चुलो वितरण गरिएको हो। तीनजुरे–मिल्के–जलजले (टिएमजे) संरक्षण क्षेत्र आयोजनको आर्थिक सहयोगमा हिमाली संरक्षण मञ्च ताप्लेजुङले जिल्लाको मैवाखोला गाउँपालिका–३ साँघुका २६० घरदुरीलाई चुलो वितरण गरिएको छ। 

३९८ घरधुरी रहेको सो वडामा पहिलो चरणमा २६० घरपरिवारलाई वितरण गरिएको हिमाली संरक्षण मञ्चका कार्यक्रम संयोजक रमेश राईले बताउनु भयो । टिएमजे संरक्षण क्षेत्र आयोजनाको १५ लाख रुपैयाँ आर्थिक सहयोग र संस्थाको समेत लगानीमा चुलो ईटहरीवाट खरिद गरी वितरण गरिएको कार्यक्रम संयोजक राईले जानकारी दिए। गाउँपालिकासँग पनि समन्वय गरेर अन्य वडाहरुमा समेत यस्तो कार्यक्रम सञ्चालन गर्ने तयारी भइरहेको हिमाली संरक्षण मञ्चका प्राविधिक तथा फिल्ड संयोजक सन्दिप सुवेदीले बताए। उनले दोस्रो चरणमा तत्कालै बाँकीलाई घरपरिवारलाई चुलो वितरण गर्ने कार्यक्रम रहेको बताए।

करिब १० हजार रुपैयाँ प्रतिगोटा पर्ने फलामे सुधारिएको चुलोमा स्थानीयले प्रतिचुलो १ हजार ५०० रुपैयाँ लगानी गरेका छन्। स्थानीयलाई हाम्रो हो भन्ने भावनाको विकास होस् भन्ने उद्देश्यले पनि केही उठाएका हौँ । कार्यक्रम संयोजक राईले भने। चुलो प्रयोगबाट महिलाले खाना पकाउने इन्धनको खोजबिनमा दिनभरि लाग्ने समयको बचत तथा स्वास्थ्यमा असर नगर्नाले सुधारिएको चुलोप्रति महिलाको आकर्षण बढेको गाउँपालिकाका प्रवक्ता तथा सो वडाका वडाध्यक्ष दिवश चोङबाङले बताए। यस्तो प्रकारको चुलोको प्रयोगले गुराँसलगायतका वन संरक्षणमा समेत टेवा पुग्ने संस्थाको अपेक्षा छ।