काठमाडौँ — पशुपतिनाथ मन्दिर परिसरका प्राचीन धार्मिक सामग्रीहरू आज सर्वसाधारणका लागि प्रदर्शन गरिएको छ।

पशुपति क्षेत्र विकास कोषले प्रत्येक वर्ष मार्गशीर्ष कृष्ण त्रयोदशी र मार्गशीर्ष कृष्ण आमावास्याको अवसरमा **नागमणि, मणि मुकुट, कवज, एकमुखे रुद्राक्ष** सहितका दुर्लभ र ऐतिहासिक धार्मिक गरगहना सार्वजनिक अवलोकनका लागि राख्ने परम्परा अनुसार आज बिहान १० देखि साढे ११ बजेसम्म प्रदर्शन गरिएको हो।

कोषका निमित्त सदस्यसचिव सुभाषचन्द्र जोशीका अनुसार सुरक्षा निकायको सहयोगमा गरगहनाहरू सुरक्षित रूपमा प्रदर्शन गरिने प्रबन्ध मिलाइएको थियो।

यसैगरी, **मार्गशीर्ष कृष्ण आमावास्याका दिन मंसिर ४ गते (बिहीबार)** बिहान ९ देखि ११:४५ सम्म पनि उक्त प्राचीन सामग्री पुनः अवलोकनका लागि राखिने कोषले जनाएको छ।

कोषका अनुसार मार्गशीर्ष कृष्ण त्रयोदशीका दिन यी सामग्री गत वर्ष सुरक्षित रूपमा राखिएको घोषणा गरिन्छ भने आमावास्याका दिन आगामी एक वर्षका लागि पुनः सुरक्षित रूपमा राखिने प्रथाअनुसार प्रदर्शन गरिन्छ।