सल्यानमा जीप दुर्घटना हुँदा चालकसहित ८ जना घाइते भएका छन् । शारदा नगरपालिका–८ जावलपुर, खलंगास्थित सुनाचौरतर्फ जाँदै गरेको लु.प्र. ०२–००१ च ०१८६ नम्बरको डबलक्याप जीप सोमबार दिउँसो १ बजेतिर दुर्घटना भएको हो ।

जिल्ला प्रहरी कार्यालय सल्यानका प्रवक्ता रेशम खत्रीका अनुसार, जीप सडकबाट करिब ४०–५० मिटर तल खसेको छ ।

दुर्घटनामा घाइतेमध्ये केहीको जिल्ला अस्पताल सल्यान र केहीको कर्णाली अस्पताल श्रीनगरमा उपचार भइरहेको छ । चालकको अवस्था गम्भीर रहेको खत्रीले बताए ।
दुर्घटनामा शारदा नगरपालिका–८ आराका २७ वर्षीय जीप चालक सुरेन्द्र कुवँर गम्भीर घाइते भएका छन् ।

यसैगरी, सोही ठाउँको सुनाचौर बस्ने ६२ वर्षीया भोटी कुमारी बुढाथोकीको निधार, छाती र देब्रे हातमा मध्यम चोट लागेको छ । सोही ठाउँका १८ वर्षीय कुल बहादुर बुढाको अनुहार र टाउकोमा पनि मध्यम चोट लागेको छ ।

यस्तै, ६९ वर्षीय लाल बहादुर भण्डारीको टाउको र छातीमा मध्यम चोट, २१ वर्षीया मञ्जुरी रानाको ढाड र छातीमा मध्यम चोट लागेको छ । मञ्जुरी रानाकी ५ महिनाकी छोरी एलिशा रानाको अवस्था भने सामान्य रहेको छ ।

यस्तै, २६ वर्षीय सुशील कुवँरको देब्रे हातमा सामान्य चोट र ८५ वर्षीय भूप बहादुर विकको देब्रे हातमा सामान्य चोट लागेको प्रहरीले जनाएको छ ।

दुर्घटना कसरी भयो भन्नेबारे थप अनुसन्धान भइरहेको प्रहरीले जनाएको छ ।

घटनालगत्तै जिल्ला प्रहरी कार्यालय सल्यानबाट प्रहरी निरीक्षक रेशम बहादुर खत्रीको कमाण्डमा ५ जनाको प्रहरी टोली घटनास्थल खटिएको थियो ।