आईसीसी टी-२० विश्वकप क्रिकेटमा बंगलादेशलाई ४ रनले पराजित गर्दै दक्षिण अफ्रिकाको लगातार तेस्रो जित
काठमाडौं । आईसीसी टी-२० विश्वकप क्रिकेटमा दक्षिण अफ्रिकाले बंगलादेशलाई पराजित गरेको छ ।
अमेरिकाको न्यूयोर्कस्थित नासाउ काउन्टी मैदानमा सोमबार राति भएको खेलमा बंगलादेशलाई ४ रनले पराजित गर्दै दक्षिण अफ्रिकाले लगातार तेस्रो जित निकालेको हो । दक्षिण अफ्रिकाले दिएको १ सय १४ रनको लक्ष्य पछ्याएको बंगलादेशले निर्धारित २० ओभरमा ७ विकेट गुमाएर १ सय ९ बनाउन सफल भएको छ ।
बंगलादेशका लागि तोहीद हृदोयले ३७, मोहम्मदुल्लाहले २० र कप्तान नजमुल होसेन सान्तोले १४ रन बनाए । केशव महाराजले ३ तथा एनरिच नोत्जे र काशिगो रवाडाले समान २ विकेट लिए ।
टस जितेर पहिले ब्याटिङ रोजेको दक्षिण अफ्रिकाले निर्धारित २० ओभरमा ६ विकेट गुमाएर १ सय १३ रन बनाएको थियो । उसका लागि हेनरिक क्लासेनले सर्वाधिक ४६, डेभिड मिलरले २९ र क्विन्टन डी ककले १८ रन बनाए । बलिङतर्फ बंगलादेशका लागि तन्जिम हसन सकिबले ३‚ तास्किन अहमदले २ र रिशद होसेनले १ विकेट लिएका हुन्।
बंगलादेशले पहिलो खेलमा श्रीलंकालाई पराति गरेको थियो । ३ खेलबाट ६ अंक जोडेको दक्षिण अफ्रिका समूहको शीर्ष स्थानमा रहेको छ । २ खेलमा एकमा जित र एकमा हार ब्यहोरेको बंगलादेश २ अंकसहित समूहमा दोस्रो स्थानमा रहेको हो ।