काठमाडौं । सरकारले बिहीबारदेखि ‘श्रमाधान रोजगार मेला’ आयोजना गर्दैछ ।

कोशी प्रदेशबाट बिहीबारदेखि शुरु हुने सोही मेला ७ वटै प्रदेशमा आयोजना गरिने भएको हो । मेलाको शुरुवात कोशी प्रदेशबाट हुने भएको छ । कोशी प्रदेशको विराटनगरस्थित सिटी प्यालेस होटल एण्ड रिसोर्टमा बिहीबार शुरु हुने मेलाको प्रधानमन्त्री पुष्पकमल दाहालले उद्घाटन गर्ने कार्यक्रम तय भएको हो । 

कोशी प्रदेशबाट शुरु हुने सोही मेला जेठ ३० गते बागमती प्रदेशमा पुगेर समापन हुने भएको छ । प्रत्येक प्रदेशमा २–२ दिन मेला सञ्चालन हुने भएको हो । 

कोशी प्रदेशको विराटनगरमा जेठ १७-१८ गते, मधेश प्रदेशको जनकपुरमा जेठ १९-२० गते, गण्डकी प्रदेशको पोखरामा २१- २२ गते, लुम्बिनी प्रदेशको बुटवलमा २३-२४ गते, कर्णाली प्रदेशको सुर्खेतमा २५-२६ गते, सुदूरपश्चिम प्रदेशको धनगढीमा २७ -२८ गते तथा बागमती प्रदेशको ललितपुरमा २९ र ३० गते मेला आयोजना हुने श्रम, रोजगार तथा सामाजिक सुरक्षा मन्त्रालयले जनाएको छ ।

आन्तरिक रोजगारीलाई प्रवर्द्धन गर्ने तथा वैदेशिक रोजगारीलाई व्यवस्थित गर्ने उद्देश्यले आयोजित मेलामा रोजगारदाता कम्पनीहरू र रोजगारीको खोजीमा रहेका नेपाली जोडिन सक्ने मन्त्रालयले बताएको हो । मेलाको बारेमा श्रमाधान कल सेन्टरको ११४१ नम्बरमा फोन गरेर जानकारी लिन सकिने मन्त्रालयले बताएको छ ।

नेपाल उद्योग वाणिज्य महासंघ, नेपाल उद्योग परिसंघ, नेपाल चेम्बर अफ कमर्स, नेपाल तालिम तथा रोजगार व्यवसायी महासंघ र होटल संघ नेपाल मेलाको सहआयोजकका रूपमा रहेका हुन् ।