काठमाडौं । अर्थमन्त्री वर्षमान पुनले मंगलबार आगामी आर्थिक वर्ष २०८१/०८२ को बजेट सार्वजनिक गर्नुहुने भएको छ ।

नयाँ बानेश्वरस्थित संघीय संसद भवनमा मंगलबार दिउँसो १ बजे दुवै सदनको संयुक्त बैठकमा आगामी वर्षको बजेट सार्वजनिक हुने भएको हो । आम्दानी र खर्च गर्ने क्षमता वृद्धिको सुनिश्चितता बिना नै सरकारले राष्ट्रिय योजना आयोगले दिएको १८ खर्बको सीमामा करिब डेढ खर्ब रुपैयाँ बढाएर आगामी आर्थिक वर्षको बजेट ल्याउने तयारी गरेको छ  ।

चालु आर्थिक वर्षमा सरकारले १७ खर्ब ५१ अर्ब ३१ करोडको बजेट ल्याएको थियो । शुरुमा ठूलो आकारको बजेट ल्याए पनि स्रोत जुटाउन र खर्च गर्न नसकेपछि सरकारले समीक्षा मार्फत बजेट घटाउँदै आएको हो । पछिल्ला २ वर्षमा सरकारले सवादेखि साढे २ खर्बले बजेटको आकार घटाएको छ । ठूलो आकारको बजेट ल्याउँदा आगामी वर्ष पनि यहि प्रवृत्ति दोहोरिने सम्भावना रहेको हो  ।

विगतका १० वर्षमा सरकारले विनियोजित बजेटको औसतमा ८० प्रतिशत मात्र खर्च गर्न सकेको छ । वित्तीय संघीयता कार्यान्वयन भएपछि संघीय सरकारबाट प्रदेश र स्थानीय तहमा हुने वित्तीय हस्तान्तरण संघीय सरकारको चालु खर्चमा लेखांकन भएकाले पूँजीगत खर्च कम रहेको सर्वेक्षणमा उल्लेख गरिएको हो ।