काठमाडौं । गण्डकी प्रदेशका ११ जिल्लाका १ लाख १० हजार ३ सय २७ जना बालबालिकालाई पोलियोेविरुद्धको इनएक्टिभेटेड पोलियो भ्याक्सिन (आइपिभी) खोप लगाइने भएको छ ।

राष्ट्रिय खोप कार्यक्रम अन्तर्गत अभियानका रुपमा यहि जेठ १३ देखि जेठ २६ गतेसम्म गण्डकीमा खोप अभियान सञ्चालन गर्न लागिएको प्रदेश सरकारको सामाजिक विकास तथा स्वास्थ्य मन्त्रालयले जनाएको हो ।

खोप कार्यक्रमका लागि ३ हजार ४ सय ५३ खोप केन्द्र, स्वास्थ्यकर्मी र ६ हजार ९ सय ६ स्वास्थ्य स्वयंसेवक परिचालित हुने सामाजिक विकास तथा स्वास्थ्य मन्त्रालयका सचिव विनोदविन्दु शर्माले जानकारी दिनुभयो ।

२०७१ सालबाट शुरु भएको आइपिभी खोप २०७३ सालको प्रारम्भदेखि विश्व बजारमा अभाव हुँदा २ वर्ष भन्दा बढी अवधिसम्म सोही खोप लगाउनबाट छुटेका थिए । छुटेका बालबालिकालाई पालियो रोग लाग्ने जोखिम रहेकाले छुटेकालाई खोप दिने उद्देश्यले अभियान सञ्चालन गर्न लागिएको सचिव शर्माको भनाइ छ ।

सचिव शर्माका अनुसार नियमित खोप तालिकाअनुसार आइपिभी खोप दिनुपर्ने उमेर र उक्त समयमा यो खोप लगाउन छुट भएका हालको उमेरलाई विश्लेषण गरी बालबालिकाको उमेर समूह निर्धारण गरिएको हो ।

२०७३ साल वैशाखदेखि २०७५ साल असोजसम्म जन्मिएका बालबालिकालाई मात्र यो खोप दिने गरी लक्ष्य निर्धारण गरिएको र सोही आधारमा खोप तथा खोप जन्य सामग्रीको आपूर्ति तथा व्यवस्थापन गरिएको छ ।

सोही अभियानका लागि निर्धारण गरिएको उमेर समूहका अधिकांश बालबालिका विद्यालयमा अध्ययन गर्ने भएकाले खोप केन्द्र समेत विद्यालयलाई बनाइएको हो । विद्यालय नजाने बालबालिका र विद्यालयमा खोप लगाउन छुट भएका बालबालिकाका लागि पायक पर्ने स्थानमा सञ्चालन हुने बाह्य खोप केन्द्र तथा अभियानको अन्तिम दिन स्वास्थ्य संस्थामा सञ्चालन हुने खोप केन्द्रमार्फत खोप लगाइने भएको छ ।

खोप अभियानमा मुस्ताङमा ४ सय ५०, म्याग्दीमा ४ हजार ३ सय ५६, बागलुङमा ११ हजार ७ सय ७१, पर्वतमा ५ हजार ७ सय र स्याङ्जामा १० हजार १ सय ५४ जना बालबालिकालाई आइपिभी खोप लगाइने भएको हो ।

यसैगरी कास्कीमा २८ हजार ३ सय ७, मनाङमा १ सय ५३, लमजुङमा ६ हजार ६ सय ६५, गोरखामा ८ हजार ५ सय ३९, तनहुँमा १४ हजार ५ सय १२ र नवलपरासीमा १९ हजार ७ सय २९ जना बालबालिकालाई खोप लगाइने लक्ष्य राखिएको छ ।

पोलियो भाइरसद्वारा लाग्ने रोग हो । सोही मुख्यरुपमा व्यक्ति–व्यक्तिबीचको सम्पर्कद्वारा फैलिन्छ । सङ्क्रमित व्यक्तिको दिसा–पिसाब समावेश खाना वा पेय पदार्थको सेवनबाट फैलिने यो रोगले मुख्य गरी ५ वर्षमुनिका बालबालिकालाई असर गर्ने चिकित्सकको भनाइ छ ।