गर्मीसँगै बढ्न थाल्यो आगलागीका घटना
मंगलबार ललितपुरको बज्रबाराही जंगलमा आगलागी भयो । थापागाउँस्थित बज्रबाराही मन्दिरको माथिल्लो क्षेत्रमा आगो लागेपछि बस्तीमा फैलिन नदिन सो क्षेत्रमा दमकलसहित सुरक्षाकर्मी परिचालन गरिए । त्यस्तै, सोमबार मात्रै कपिलवस्तुमा आगलागीबाट ६ घर गोठ जलेर नष्ट भएको छ । स्थानीय मोतीराम यादवको घरबाट सुरु भएको आगोले सीताराम यादव, रामचन्द्र यादव, अधारे यादव र भिख्की यादवको घर गोठ जलेर नष्ट भएको हो। सोही दिन विराटनगरमा होटल र पसलमा आगलागी हुँदा चार पसल पूर्णरूपमा नष्ट भएको छ ।
यसरी गर्मी सिजनमा आगलागीको घटना नभएको दिन नै हुँदैन । विपद् जोखिम न्यूनीकरण तथा व्यवस्थापन प्राधिकरणको बुलेटिनलाई आधार मान्दा प्रत्येक दिन करिब १० आगलागीका घटना भएका छन् । राष्ट्रिय विपद् जोखिम न्यूनीकरण तथा व्यवस्थापन प्राधिकरणको तथ्याङ्कअनुसार वैशाख १ देखि ६ सम्म ५ दिनको अवधिमा मात्रै आगलागीको ९८ घटना भएका छन् ।