अस्ट्रियाले फिफा विश्वकपको फाइनल चरणमा १९९० यताकै पहिलो जित दर्ता गर्दै डेब्यु टोली जोर्डनलाई ३–१ ले पराजित गरेको छ। स्यान फ्रान्सिस्कोमा भएको खेलमा रोमानो स्मिडले २१औँ मिनेटमा गोल गर्दै अस्ट्रियालाई अग्रता दिलाएका थिए। दोस्रो हाफको सुरुआतमै अली ओलवानले शानदार गोल गर्दै जोर्डनलाई खेलमा फर्काए पनि अस्ट्रियाले अन्तिम समयमा खेल आफ्नो पक्षमा पार्न सफल भयो।

मार्को अर्नाउटोभिचको एक गोल भिडियो सहायक रेफ्री (भिएआर) मार्फत रद्द भए पनि ७६औँ मिनेटमा जोर्डनका डिफेन्डर याजान अल अरबको आत्मघाती गोलबाट अस्ट्रियाले पुनः अग्रता बनायो। त्यसपछि इन्जुरी समयको १२औँ मिनेटमा प्राप्त पेनाल्टीलाई अर्नाउटोभिचले गोलमा परिणत गर्दै ३–१ को जित सुनिश्चित गरे।

पूर्व म्यानचेस्टर युनाइटेड प्रशिक्षक राल्फ रङ्गनिकको प्रशिक्षणमा रहेको अस्ट्रियाले विश्वकप फाइनल चरणमा १९९८ पछि पहिलोपटक सहभागिता जनाएको हो। टोलीले यसअघि विश्वकपमा अन्तिम जित सन् १९९० मा अमेरिकाविरुद्ध हासिल गरेको थियो। अब अस्ट्रियाले समूह चरणको अर्को खेलमा साविक विजेता अर्जेन्टिनासँग प्रतिस्पर्धा गर्नेछ।