काठमाडौँ — जात व्यवस्थाले निम्त्याएको तहगत उत्पीडन, हिंसा र ऐतिहासिक विभेदको विरोधमा आइतबार काठमाडौँको माइतीघर मण्डलामा प्रदर्शन गरिएको छ।

जात व्यवस्था उन्मूलन मोर्चा नेपाल प्रथम राष्ट्रिय सम्मेलन आयोजक समितिको संयोजनमा भएको र्‍यालीमा देशभरबाट आएका उत्पीडित नागरिक, बौद्धिक समुदाय तथा मानवअधिकारकर्मीहरूको सहभागिता रहेको थियो।

प्रदर्शनकारीहरूले जातीय विभेद अन्त्य, सामाजिक न्याय र समानताको माग गर्दै विभिन्न नारा लेखिएका प्लेकार्ड बोकेका थिए। उनीहरूले “श्रम सबैको बराबर चल्ने तर अन्तरजातीय सम्बन्धकै कारण हिंसा हुने अवस्थाको अन्त्य विना लोकतन्त्र अधुरो रहने” जस्ता सन्देशसहित प्रदर्शन गरेका थिए।

कार्यक्रममा सहभागीहरूले ६ वर्षअघि रुकुम सोतीमा प्रेम विवाहकै कारण मारिएका नवराज विकसहित ६ जनाको घटनालाई स्मरण गर्दै न्यायको माग दोहोर्याएका थिए। उनीहरूले उक्त घटनालाई जातीय विभेदको चरम रूप भन्दै राज्यको जवाफदेहितामाथि प्रश्न उठाएका थिए।

प्रदर्शनकारीहरूले भूमिहीन दलितका लागि खेतीयोग्य जमिन उपलब्ध गराउन, दलित विद्यार्थीका लागि छात्रवृत्तिसहित निःशुल्क शिक्षा सुनिश्चित गर्न तथा दलित हत्याकाण्डहरूको छानबिन गर्न उच्चस्तरीय स्वतन्त्र आयोग गठन गर्न माग गरेका छन्।

उनीहरूले अन्तरजातीय प्रेमका कारण हुने हिंसा अन्त्य नभएसम्म वास्तविक लोकतन्त्र सम्भव नहुने भन्दै राज्यलाई गम्भीर हुन आग्रह गरेका छन्।