काठमाडौं । आईसीसी टी–२० विश्वकप अन्तर्गत उद्घाटन खेलमा पाकिस्तानले नेदरल्याण्ड्सलाई तीन विकेटले पराजित गरेको छ। श्रीलंकाको कोलम्बोस्थित सिंहाली स्पोर्ट्स क्लब क्रिकेट मैदानमा भएको खेलमा नेदरल्याण्ड्सले दिएको १४८ रनको लक्ष्य पाकिस्तानले तीन बल बाँकी छँदै पूरा गर्‍यो।

पाकिस्तानको जितमा शाहिबजादा फरहानले सर्वाधिक ४७ रनको योगदान दिए। ३१ बल खेलेका फरहानले चार चौका र दुई छक्का प्रहार गरे। फहिम अशरफले ११ बलमा आक्रामक २९ रन बनाए, जसमा दुई चौका र तीन छक्का समावेश थिए। साइम ऐयुबले १३ बलमा २४ रन जोडे।

बलिङतर्फ नेदरल्याण्ड्सका आर्यन दत्त र पउल भान मिकेरेनले समान दुई–दुई विकेट लिए भने लोगन भान बिक, काइल क्लेइन र रोलोफ भान डेर मेर्वेले समान एक–एक विकेट लिए।

यसअघि टस हारेर पहिले ब्याटिङ गरेको नेदरल्याण्ड्सले इनिङको एक बल बाँकी छँदै सबै विकेट गुमाउँदै १४७ रन बनाएको थियो। नेदरल्याण्ड्सका कप्तान स्कट एडवर्ड्सले सर्वाधिक ३७ रन बनाए। २९ बल खेलेका उनले तीन चौका र एक छक्का प्रहार गरे।

त्यस्तै, बस डे लिडले २५ बलमा ३० रन बनाए भने ओपनर ब्याटर माइकल लेभिटले १५ बलमा २४ रनको योगदान दिए।

पाकिस्तानका बलरमध्ये सलमान मिर्जाले तीन विकेट लिए। मोहम्मद नवाज, अब्रार अहमद र साइम ऐयुबले समान दुई–दुई विकेट लिए भने शहीन शाह अफ्रिदीले एक विकेट हात पारे।

पाकिस्तानले विश्वकपको सुरुवात जितसँगै गरेको छ भने नेदरल्याण्ड्स पराजयबाट प्रतियोगिता सुरु गर्न बाध्य भएको छ।