आईसीसी टी–२० विश्वकप अन्तर्गत समूह चरणको दोस्रो खेलमा नेपालले इटलीविरुद्ध टस हारेर पहिले ब्याटिङ गर्ने भएको छ।

इटलीका निमित्त कप्तान ह्‍यारी मानेन्तीले टस जितेर बलिङ रोजेपछि नेपाललाई ब्याटिङको निम्तो दिएका हुन्। आजको खेलका लागि नेपालले टोलीमा एक परिवर्तन गरेको छ। शेर मल्लको स्थानमा ललित राजवंशीलाई समावेश गरिएको छ।

नेपाल पहिलो खेलमा इंग्ल्यान्डसँग पराजित भएको थियो भने इटली पनि आफ्नो पहिलो खेलमा स्कटल्यान्डसँग हार व्यहोरेको थियो। दुवै टोली आज पहिलो जितको खोजीमा मैदान उत्रिएका छन्।

नेपालको प्लेइङ–११ मा कुशल भुर्तेल, आसिफ शेख, रोहित पौडेल, दीपेन्द्रसिंह ऐरी, आरिफ शेख, गुल्शन झा, लोकेश बम, करण केसी, नन्दन यादव, ललित राजवंशी र सन्दीप लामिछाने रहेका छन्।