एनपीएल : सुदूरपश्चिम अपराजित रहँदै क्वालिफायर–१ मा, चितवन ४९ रनले पराजित
१८ मंसिर, काठमाडौं । क्रिस लिनको दमदार अर्धशतक र बलरहरूको उत्कृष्ट प्रदर्शनमा सुदूरपश्चिम युनाइटेडले चितवन राइनोजलाई ४९ रनले पराजित गर्दै सिद्धार्थ बैंक नेपाल प्रिमियर लिग (एनपीएल) को क्वालिफायर–१ मा स्थान पक्का गरेको छ। लगातार छैटौं जितसँगै १२ अंक बटुलेको अपराजित सुदूरपश्चिम शीर्ष दुईमा पुग्दै प्लेअफको पहिलो चरणमा प्रवेश गरेको हो।
चितवनको भने यो चौथो हार हो। ६ खेलबाट ४ अंकमात्रै जोडेको चितवन छैटौं स्थानमा झरेको छ र प्लेअफ पुग्ने सम्भावना क्षीण बनेको छ।
सुदूरपश्चिमको जितसँगै तेस्रो स्थानको विराटनगर किंग्स पनि एक खेल अगावै प्लेअफ सुरक्षित गरेको छ। ६ खेलबाट ८ अंकसहित विराटनगर अब तालिकामा लुम्बिनी बाहेक अन्य टोलीले भेट्न नसक्ने भएकोले उसलाई फाइदा पुगेको हो। त्यसैगरि पोखरा र चितवनको बिहीबारको हारपछि लुम्बिनी लायन्सले पनि प्लेअफ अवसर पाएको छ। लुम्बिनीले शुक्रबार जनकपुरलाई हराए प्लेअफ पुग्नेछ।
१७० रनको लक्ष्य पछ्याएको चितवन १७.१ ओभरमै १२० रनमा समेटियो। रवि बोपाराले २९, देव खनालले २८, अर्जुन साउदले १६ र कप्तान कुशल मल्लले १५ रन बनाए पनि अन्य ब्याट्सम्यानले साथ दिन सकेनन्।
सुदूरपश्चिमका पुनित मेहराले २.१ ओभरमा १४ रन खर्चेर ३ विकेट लिए। दीपेन्द्र सिंह ऐरी, हिक्मत महरा, अविनाश बोहरा र इशान पाण्डेले १–१ विकेट हात पारे।
यसअघि कीर्तिपुरस्थित टीयू मैदानमा टस हारेर पहिले ब्याटिङ गरेको सुदूरपश्चिमले २० ओभरमा ४ विकेट गुमाएर १६९ रन बनायो। नियमित ओपनर जोश ब्राउनलाई आराम दिइएपछि विनोद भण्डारीसँग ओपनिङ गरेका क्रिस लिनले ५६ बलमा ५ चौका र ३ छक्का प्रहार गर्दै ७५ रन बनाए। उनी १७औँ ओभरपछि रिटायर हर्ट भएका थिए।
लिनले विनोद भण्डारीसँग पहिलो विकेटका लागि ४६ रन र आरिफ शेखसँग पाँचौँ विकेटका लागि ४५ रनको साझेदारी गरे। आरिफ शेख र कप्तान दीपेन्द्र सिंह ऐरी दुवैले अविजित २४–२४ रन जोडे। विनोद भण्डारीले २१ तथा पुनित मेहराले १३ रन थपे।
चितवनका बलरमा सैफ जैबले २ विकेट लिए भने रन्जित कुमार र जर्ज स्मृक्शले १–१ विकेट हात पारे।
