काठमाडौं । न्युरोडमा फुटपाथको विषयलाई लिएर सडक डिभिजन कार्यालय काठमाडौं र काठमाडौं महानगरप्रहरीबीच विवाद भएको छ।

सडक डिभिजन कार्यालयले सडक पिच गरिरहेको बेला महानगरपालिका प्रमुख बालेन्द्र साह बालेन पक्षले रोक्न खोजेपछि विवाद भएको हो। उनीहरूले त्यहाँ नाराबाजी नै गरेका छन्।

काठमाडौं महानगरपालिकाले न्युरोड गेटदेखि जुद्ध सालिकसम्म सवारी साधन गुड्ने क्षेत्र घटाएर फुटपाथ थप्न सडक काटेको थियो। तर संघीय सरकारको मातहत उक्त सडक महानगरले अनुमतिबिना भत्काएको भन्दै सडक डिभिजन कार्यालय काठमाडौंले रोकेको हो।

सडक डिभिजन कार्यालय काठमाडौंले पत्र पठाएर २ दिनभित्र यथास्थितिमा पुनःस्थापना गरिदिनु भनेको थियो। तर महानगरपालिकाले सडक नबनाएपछि सोमबार सडक डिभिजन कार्यालयले कालोपत्र गर्न थालेको छ।